*

föstudagur, 15. desember 2017
Innlent 15. nóvember 2017 09:19

Birkir Hólm hættir hjá Icelandair

Björgólfur Jóhannsson verður eini forstjórinn hjá Icelandair í kjölfar skipulagsbreytinga hjá Icelandair Group.

Ritstjórn
Gígja Dögg Einarsdóttir

Stjórn Icelandair Group hefur ákveðið að gera breytingar á skipulagi samstæðunnar. Breytingarnar fela í sér að rekstur og starfsemi Icelandair Group og Icelandair verður samþætt með þeim hætti að einn forstjóri verður yfir báðum félögum auk þess sem fjármálasvið félaganna verða sameinuð. 

Forstjóri verður Björgólfur Jóhannsson og framkvæmdastjóri fjármála verður Bogi Nils Bogason. Þá verða IGS, sem sinnir flugþjónustu á Keflavíkurflugvelli, og Icelandair Cargo, hluti af Icelandair, en þessi félög hafa verið dótturfélög Icelandair Group. Birkir Hólm Guðnason lætur af störfum sem framkvæmdastjóri Icelandair.

Með breytingunni næst fram skýrari áhersla á kjarnastarfsemi félagsins og er samþættingin skref í átt að aukinni einföldun og hagkvæmni í rekstri segir í fréttatilkynningu. Úlfar Steindórsson, stjórnarformaður Icelandair Group segir breytingarnar vera lið í því að styrkja félagið enn frekar og skerpa á áherslur í rekstrinum. 

„Flugstarfsemi félagsins vegur þyngst í rekstri og afkomu samstæðunnar og það er mikilvægt að skipulag félagsins endurspegli þá staðreynd,“ segir Úlfar. 

„Félagið er í sterkri stöðu til að takast á við breytingar í rekstrarumhverfinu og nýta tækifæri sem gefast á mörkuðum félagsins. Breytingin styður við áframhaldandi sókn félagsins og gerir því kleift að sinna áfram þörfum viðskiptavina sinna á hagkvæman hátt með góða þjónustu að leiðarljósi.

Ég vil þakka Birki Hólm Guðnasyni fyrir gott starf sem framkvæmdastjóri Icelandair. Hann á stóran þátt í vexti og velgengni félagsins á undanförnum árum.“