*

laugardagur, 20. október 2018
Fólk 21. september 2018 14:01

Birkir Hólm ráðinn forstjóri Samskipa

Birkir Hólm Guðnason hefur verið ráðinn forstjóri Samskipa, en hann starfaði áður í 18 ár hjá Icelandair, þar af tæp 10 sem framkvæmdastjóri.

Ritstjórn
Birkir Hólm Guðnason hefur verið ráðinn forstjóri Samskipa.
Aðsend mynd

Birkir Hólm Guðnason hefur verið ráðinn forstjóri Samskipa. Birkir starfaði áður í 18 ár hjá Icelandair, þar af 6 ár á erlendum mörkuðum, og tæp 10 ár sem framkvæmdastjóri, frá 2008 þar til hann lét af störfum hjá félaginu í lok síðasta árs. Þetta kemur fram í tilkynningu frá félaginu nú síðdegis.

Pálmar Óli Magnússon lætur af störfum að eigin ósk og verður viðloðandi félagið við innleiðingu nýs siglingakerfis Samskipa auk þess að vera Birki innan handar á meðan hann kemur sér fyrir í nýju starfi.

Birkir segir að um spennandi tækifæri sé að ræða fyrir sig. „Ég hef mikla reynslu af rekstrarumhverfi fyrirtækis sem starfar á alþjóðlegum markaði og fyrir mér eru sömu lögmál að verki í rekstri þessara fyrirtækja. Annars vegar erum við að tala um siglingakerfi og hins vegar leiðakerfi. Vinnan snýst að miklu leyti um að veita góða þjónustu, áreiðanleika og aðgengileika á hagkvæman máta og þar sé ég spennandi tækifæri fyrir okkar viðskiptavini. „Together we make things happen,“ er slagorð Samskipa og ég finn mig vel í því og hlakka til samstarfsins. Með bakland í stóru alþjóðlegu fyrirtæki höfum við allt sem þarf til að sækja fram af miklu afli og það verður spennandi að vera hluti af þeim vexti.“ segir Birkir.

„Við höfum nýlega kynnt nýtt siglingakerfi til að sinna íslenska markaðnum enn betur. Með breytingunum stóraukum við flutningsgetu félagsins, bætum áreiðanleika þjónustunnar og eflum. Við ætlum okkur að spila öflugan sóknarbolta og auka markaðshlutdeild Samskipa. Pálmari erum við þakklát fyrir samstarfið síðastliðin ár og fyrir framlag hans til félagsins. Birki býð ég jafnframt velkominn. Ég þekki hann vel og veit að við erum heppin að fá hann með okkur í lið,“ er haft eftir Ásbirni Gíslasyni, nýjum stjórnarformanni Samskipa hf.