Eins og búist var við skipar Bjarni Benediktsson, formaður Sjálfstæðisflokksins, efsta sæti á lista flokksins í suðvesturkjördæmi, en kjördæmið er oft nefnd Kraginn. Bjarni sóttist einn eftir fyrsta sætinu.
Jón Gunnarsson þingmaður varð í öðru sæti en það sæti skipaði Ragnheiður Ríkharðsdóttir fyrir kosningarnar 2013. Ragnheiður gaf ekki kost á sér núna. Óli Björn Kárason ritstjóri varð í þriðja sæti og Vilhjálmur Bjarnason þingmaður í því fjórða.
Sjáfstæðisflokkurinn fékk fimm þingmenn kjörna í suðvesturkjördæmi árið 2013. Bryndís Haraldsdóttir, formaður bæjarráðs Mosfellsbæjar, varð í fimmta sæti í prófkjörinu um helgina og gæti því verið á leið á þing. Karen Elísabet Halldórsdóttir, bæjarfulltrúi í Kópavogi og varaþingmaður varð í sjötta sæti. Elín Hirst, sem setið hefur á þingi síðan 2013, hlaut ekki brautargengi í prófkjörinu um helgina.