*

föstudagur, 16. nóvember 2018
Fólk 17. september 2008 17:28

Björn Óli Hauksson ráðinn forstjóri Keflavíkurflugvallar

Ritstjórn

Björn Óli Hauksson rekstrarverkfræðingur hefur verið ráðinn forstjóri Keflavíkurflugvallar ohf., nýs opinbers hlutafélags sem tekur formlega við rekstri Flugmálastjórnar Keflavíkurflugvallar og Flugstöðvar Leifs Eiríkssonar ohf. 1. janúar 2009.

Björn Óli heimsótti í dag Kristján L. Möller samgönguráðherra á skrifstofu hans af þessu tilefni en þetta kemur fram í tilkynningu frá samgöngumálaráðuneytinu.

Þar kemur fram að umsækjendur um stöðuna voru 55 talsins. Hagvangur sá um að auglýsa eftir umsóknum og meta þær á faglegum forsendum, að sögn ráðuneytisins.

„Niðurstaðan var sú að Björn Óli væri hæfastur umsækjenda, enda með mikla og víðtæka reynslu og þekkingu til að takast á við yfirstjórn í nýju og öflugu fyrirtæki, Keflavíkurflugvelli ohf. Stjórn félagsins samþykkti í dag að ráða Björn Óla sem hefur störf 1. október næstkomandi,“ segir í tilkyningunni.

Björn Óli Hauksson hefur undanfarin sex ár unnið að uppbyggingu flugmála í Kósóvó sem forstjóri Pristina International Airport J.S.C og sem verkefnisstjóri þar á vegum Flugmálastjórnar Íslands og Flugstoða ohf.

Hann setti þar á laggir flugmálastjórn Sameinuðu þjóðanna (CARO - UNMIK Civil Aviation Regulatory Office) og hefur þar með reynslu af að stjórna alþjóðaflugvelli með tilheyrandi faglegri og fjárhagslegri ábyrgð, stefnumótun og málum sem varða skipulag, umhverfi, öryggi og faglegt eftirlit.

Björn Óli tók meðal annars þátt í að sameina fyrirtæki um rekstur flugvallar og flugstöðvar í Kósóvó og hefur unnið að því að byggja upp sameinað félag þar að lútandi.

Björn Óli er 47 ára að aldri og er með meistaragráðu í rekstrarverkfræði frá Álaborgarháskóla í Danmörku.

Hann hefur starfað í Kósóvó frá því árið 2000, fyrst sem tæknisérfræðingur við uppbyggingu mannvirkja og tæknibúnaðar en síðar sem sérfræðingur og umsjónarmaður fjölda verkefna í stjórnsýslunni og rekstri hins opinbera þar.