*

sunnudagur, 21. apríl 2019
Innlent 8. mars 2019 13:36

Borgin fær skammir vegna fundarboða

Sveitarstjórnarráðuneytið vill úrbætur því fundarboð voru ekki send til allra í ráðum borgarinnar og með of skömmum fyrirvara.

Ritstjórn
Eyþór Arnalds oddviti Sjálfstæðismanna í Reykjavík segir gott að fá staðfestingu á að ekki hafi verið rétt staðið að málum hjá borginni eftir athugasemdir borgarstjórnarflokksins.
Haraldur Guðjónsson

Samgöngu- og sveitarstjórnarráðuneytið hefur komist að þeirri niðurstöðu að fundarboð í samgöngu- og skipulagsráði, 15. ágúst 2018, hafi var gallað og ekki í samræmi við reglur borgarinnar.

Fulltrúar Sjálfstæðisflokks gerðu athugasemdir við hvernig staðið var að boðun fundarins en ekki fengu allir fundarmenn fundarboð. Þá gerðu þeir jafnframt athugasemdir við að fundargögn og dagskrá voru ekki aðgengileg innan tilskilins lágmarksfrest sem er sólarhringur en fyrir fundinum lágu 75 veigamikil mál.

Ráðuneytið beinir þeim tilmælum til Reykjavíkurborgar að framvegis verði tryggt að boðun funda stjórnsýslunefnda uppfylli ávallt kröfur laga og reglna.

Jafnframt telur ráðuneytið að rétt sé að lengja þann lágmarksfyrirvara sem er á útsendingu fundarboðs, dagskrár og fundargagna fyrir fundi skipulags- og samgönguráðs og eftir atvikum annarra fastanefnda borgarinnar úr einum sólarhring í tvo.

Ágallar sem þessir eru sagðir til þess fallnir að valda óvissu um gildi þeirrar ákvarðana sem þar eru teknar. Slíkir gallar geta haft alvarlegar afleiðingar fyrir dómstólum.

Gagnrýna lausatök í stjórnsýslunni

Borgarfulltrúar Sjálfstæðisflokksins hafa gagnrýnt lausatök í stjórnsýslu borgarinnar og er hér staðfest dæmi um slíkt að því er segir í fréttatilkynningu frá borgarstjórnarflokknum. Ágallar í meðferð mála hjá Reykjavíkurborg hafa ítrekað orðið til þess að kærur og dómsmál hafa fallið borginni í óhag.

Mikilvægt er að meðferð mála hjá Reykjavíkurborg sé í föstum skorðum og lögmæti ákvarðana hafin yfir vafa. Eyþór Arnalds, oddviti Sjálfstæðisflokks í borgarstjórn Reykjavíkur, bendir á að dagskrá fundarins hafi verið 75 mál og umtalsverður fjöldi gagna sem ráðsmenn verði að kynna sér.

„Flest þessara mála varða heilmikla hagsmuni fyrir borgarbúa og skiptir miklu að rétt sé haldið á allri ákvarðanatöku. Öðrum kosti geta þeir aðilar sem eiga mál fyrir nefndinni, látið reyna á lögmæti ákvarðanatöku fundarins, fyrir dómstólum eða eftir öðrum leiðum. Fulltrúar Sjálfstæðisflokks leggja ríka áherslu á vönduð og fagleg vinnubrögð í málaflokknum,“ segir Eyþór.

„Það er gott að fá staðfestingu að hér var ekki rétt staðið að hjá borginni. Það er jafnframt mikilvægt að borgin fari að þeim tilmælum sem sveitarstjórnarráðuneytið beinir til borgarinnar í bréfinu.“

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim