Búið er að frysta eigur breska kaupsýslumannsins Marks Holyoake í Bretlandi. Fyrir utan það að vera eigandi British Seafood, sem er alþjóðlegt fyrirtæki í sölu og markaðssetningu sjávarafurða og er nú í greiðslustöðvun, á Holyoke 73% hlut í Iceland Seafood International, forvera SÍF á Íslandi en Holyoke keypti félagið í byrjun þessa árs.
Nokkuð hefur blásið um Holyoake að undanförnu. Skömmu eftir að hann keypti Iceland Seafood af Kjalari, félagi í eigu Ólafs Ólafssonar, má segja að viðskiptaveldi hans hafi hrunið og um miðjan mars tók breska efnahagslögreglan (SFO) upp rannsókn á viðskiptum British Seafood.
Greint var frá í fyrradag á vef IntraFish að eigur Holyoake, bróður hans Laurence og David Wells, fjármálastjóra British Seafood, hefðu verið frystar. Beiðni um frystingu eigna kom frá þrotabúum Bloomsbury Int., Seafood Intermediary og British Seafood Holdings sem öll voru áður í eigu Holyoake.
_____________________________
Nánar er fjallað um málið í Viðskiptablaðinu. Áskrifendur geta lesið blaðið á pdf-formi hér á vefnum og þeir sem ekki hafa lykilorð geta sótt um það hér .
