*

fimmtudagur, 23. nóvember 2017
Innlent 16. ágúst 2017 09:41

Brunnur kaupir hlutafé í Ghostlamp

Kaupsamningur hefur verið gerður á milli Brunns vaxtarsjóðs og Ghostlamp um að Brunnur kaupi hlutafé í félaginu sem styrkir stækkunaráform félagsins næstu árin.

Ritstjórn
Aðsend mynd

Kaupsamningur hefur verið gerður á milli Brunns vaxtarsjóðs og Ghostlamp um að Brunnur kaupi hlutafé í félaginu sem styrkir stækkunaráform félagsins næstu árin. Samkomulag varð um sölu hlutafjár upp á 1 milljón Bandaríkjadollara og vilyrði um 1 milljón Bandaríkjadollara til viðbótar í fjármögnun, að lágmarki, við áframhaldandi stækkun félagsins. Þetta kemur fram í tilkynningu.

Ghostlamp er markaðstorg á vefnum sem gerir fyrirtækjum og auglýsingastofum kleift að virkja áhrifavalda á samfélagsmiðlum hvar sem er í heiminum. Auglýsendur búa til herferð inni á vefsíðu Ghostlamp og í framhaldi sendir Ghostlamp út boð á viðeigandi áhrifafólk á samfélagsmiðlum og býður þeim að taka þátt í herferðinni, áhrifavaldar sem samþykkja búa svo til frábært efni fyrir auglýsandann og birta á sínum samfélagsmiðlum. Fyrirtækið hefur nú um sex milljónir áhrifavalda víðs vegar um heiminn á skrá en þeim fjölgar hratt. Áhrifavaldar eru flokkaðir eftir áhrifum, áhugamálum, búsetu, aldri og kyni. Nú þegar hefur Ghostlamp unnið herferðir í þremur heimsálfum fyrir viðskiptavini víðs vegar um heiminn og stefnt er að velta félagsins verði fjórar milljónir bandaríkjadollara á næstu tólf mánuðum. 

Framkvæmdastjóri og stofnandi félagsins, Jón Bragi Gíslason, er mjög ánægður með samstarfið við Brunn: „Við höfum byggt upp lausn sem vinnur á allt annan hátt en fyrir er á markaðnum. Auglýsendur geta á mjög auðveldan hátt búið til herferðir á www.ghostlamp.com og fylgst með þeim. Ghostlamp birtir allt efni frá öllum þátttakendum herferðarinnar og árangur í heild sinni á einum stað, algrímur reikna svo út hversu mikið áhrifavaldar fá greitt miðað við áhrif þeirra á hverjum tíma. Að nota Ghostlamp er ekki ósvipað og auglýsendur búa til Google-herferðir og nota Google Analytics fyrir netauglýsingar, nema hjá okkur er miðillinn fólk, áhrifavaldar sem eiga samskipti við þúsundir einstaklinga á hverjum degi. Ghostlamp tryggir að allir áhrifavaldar fái greitt fyrir að deila sköpunargleði sinni, í samstarfi við vörumerki, með fylgjendum sínum. Ghostlamp er frábært verkfæri til að vekja athygli á vörum, þjónustum, viðburðum og mörgu fleiru. Með samstarfi við Brunn fáum við ekki bara fjármagn til að fylgja stækkunaráformum okkar eftir heldur ómetanlega reynslu fólks sem hefur staðið í svipuðum sporum á undan okkur“.

Hjá Ghostlamp starfa nú níu manns á skrifstofum félagsins í Hafnarfirði. Einnig er félagið að hefja starfsemi í Los Angeles, Barcelona og fleiri borgum á næstunni. Ghostlamp var stofnað árið 2014 en árið 2015 fjárfesti PIPAR\TBWA í félaginu og bættist þá Valgeir Magnússon sem meðstofnandi í teymið. Í kjölfarið kom nýtt teymi hugbúnaðarsérfræðinga inn í félagið sem meðstofnendur, þeir Andri Birgisson, Óli Tómas Freysson og Kári Magnússon. Vetragil ehf. fjárfesti svo í félaginu sumarið 2016. Í ágúst 2016 hófst rekstur af fullum krafti hjá félaginu og hefur velta vaxið stöðugt frá þeim tíma. 

„Við fjárfestum eingöngu í fyrirtækjum þar sem við sjáum fram á mjög mikinn vöxt og verðmætaaukningu. Einnig þurfa fyrirtækin sem við fjárfestum í að vera skalanleg alþjóðlega. Við höfum fylgst með Ghostlamp núna í rúmlega tvö ár og sjáum að það fyrirtæki á alla möguleika til að stækka hratt og ná alþjóðlegum árangri," segir Árni Blöndal, hjá SA Framtaki, sem í samvinnu við Landsbréf stjórnar Brunni. 

Stikkorð: fjármögnun hlutafé Ghostlamp Brunnur