*

laugardagur, 17. nóvember 2018
Innlent 14. júní 2018 12:27

Deloitte semur við FKA

Samstarfið er partur af hreyfiafls-verkefninu Jafnvægisvoginni.

Ritstjórn
Sigurður Páll Hauksson, forstjóri Deloitte.
Haraldur Guðjónsson

Deloitte hefur skrifað undir samning við Félag kvenna í atvinnulífinu um samstarf í hreyfiafls-verkefninu Jafnvægisvoginni, sem formlega fór af stað í síðasta mánuði. Deloitte mun taka  saman heildræn gögn á stöðu jafnréttis meðal stjórnenda í íslensku atvinnulífi. Þetta kemur fram í fréttatilkynningu frá Deloitte. 

Markmið Jafnvægisvogarinnar er að árið 2027 verði hlutfallið á milli kynja 40/60 í framkvæmdastjórnum fyrirtækja á Íslandi.

„Við höfum náð jöfnum kynjahlutföllum Jafnvægisvogar í framkvæmdaráði og stjórn og höfum lagt mikla áherslu á að búa til sterkar kvenfyrirmyndir með því að efla sérstaklega kvenstjórnendur.  Við erum afskaplega ánægð með að hafa fengið þetta tækifæri til að vinna með FKA að þessu þjóðþrifa verkefni. Okkar starfsemi byggir í heild sinni á mannauði, þ.e. hugviti og metnaði okkar sérfræðinga. Fjölbreytni í þekkingu, reynslu og viðhorfum er því sérstaklega mikilvæg en þar eru jafnréttismál lykilatriði. Við höfum t.a.m. lagt mikið upp úr því að kynjahlutföll þeirra sem fara í löggildingarpróf séu sem jöfnust," er haft eftir Sigurðuri Páli Haukssyni, forstjóra Deloitte í tilkynningunni. 

„Fyrsta verkefni Jafnvægisvogarinnar er að taka saman heildræna stöðu jafnréttis meðal stjórnenda í íslensku atvinnulífi og birta niðurstöðurnar og er sú vinna hafin.  Að því búnu er mögulegt að kortleggja aðgerðir. Við viljum hvetja stjórnendur fyrirtækja á Íslandi til þess að skrifa undir viljayfirlýsingu um að hefja þessa vegferð með okkur og vinna að jöfnum tækifærum kynjanna. Takið frá 31. október því þá verður ráðstefna þar sem niðurstöður verða kynntar og fyrirmyndarfyrirtæki kynna aðgerðir," er haft eftir Guðrúnu Ragnarsdóttur, stjórnarkonu FKA og talsmanni Jafnvægisvogarinnar í tilkynningunni.