Dorrit Moussaieff tengist minnst fimm bankareikningum í Sviss og tveim aflandsfélögum í gegnum fjölskyldu sína
Þetta kemur fram í gögnum sem uppljóstrarar létu Le Monde, Süddeutshe Zeitung og ICJ fá og kallast Swiss Leaks og Panama Papers. Greint er frá þessu í frétt á heimasíðu Reykjavik Media í gærkvöldi. Ýmsir erlendir fjölmiðlar hafa auk þess fjallað um málið.
Í fréttinni segir að fjölskylda Dorritar, þar á meðal systur hennar tvær, hafi átt reikninga með allt að 80 milljón dollara innistæðum í HSBC bankanum í Sviss árin 2006 og 2007. Dorrit virðist þó sjálf ekki hafa komið að flestum reikningunum.
Samkvæmt Reykjavik Media sýna gögnin engin lögbrot Dorritar enda er það er ekki ólöglegt að eiga aflandsfélög eða svissneska bankareikninga. Hinsvegar telur miðillinn að gögnin vekji engu að síður upp spurningar um hvort að forsetafrú Íslands hafi hagnast á aflandsviðskiptum foreldra hennar og hvort gerð hafi verið grein fyrir eignum hennar.
Í yfirlýsingu sem send var Reykjavik Media sagði Dorrit að fjárhagur sinn og Ólafs Ragnars væri og hefði alltaf verið aðskilinn og þá sagði Örnólfur Thorsson forsetaritari í skriflegu svari að forsetinn hefði enga vitneskju um félögin og að hann hefði aldrei heyrt um þau. Þá sagði í svari Örnólfs að forsetinn hefði aldrei haft upplýsingar um aðra meðlimi Moussaieff fjölskyldunnar.