*

mánudagur, 10. desember 2018
Innlent 1. nóvember 2018 10:02

Dregur úr hagnaði í sjávarútvegi

Hreinn hagnaður (EBT) í sjávarútvegi, samkvæmt árgreiðsluaðferð, nam 6,5% árið 2017 samanborið við 14,4% árið áður.

Ritstjórn
Haraldur Guðjónsson

Hagnaður sjávarútvegsfyrirtækja fyrir afskriftir, fjármagnskostnað og tekjuskatt (verg hlutdeild fjármagns, EBITDA) sem hlutfall af heildartekjum lækkaði milli áranna 2016 og 2017. Þetta kemur fram á vef Hagstofunnar. 

Í fiskveiðum og -vinnslu lækkaði hlutfallið (án milliviðskipta) úr 25,4% í 21,1%, í fiskveiðum fór hlutfallið úr 24,2% í 18,2% og í fiskvinnslu úr 11,9% í 10,6%.

Hreinn hagnaður (EBT) í sjávarútvegi, samkvæmt árgreiðsluaðferð, nam 6,5% árið 2017 samanborið við 14,4% árið áður. Í fjárhæðum nam hagnaðurinn 11,8 milljörðum króna eftir að gjaldfærð hefur verið árgreiðsla að fjárhæð 26,7 milljarðar. Sé miðað við hefðbundna uppgjörsaðferð er niðurstaðan 6,8% hagnaður árið 2017 eða 12,5 milljarður, samanborið við 24% hagnað árið 2016.

Áhrifaþættir á afkomu í sjávarútvegi

Rekstrarárið 2017 gætti áhrifa verkfalls sjómanna sem hófst í desember 2016 og stóð í tæpar 10 vikur. Verð sjávarafurða á erlendum mörkuðum í íslenskum krónum lækkaði um 6,7% frá fyrra ári og verð á olíu hækkaði að meðaltali um 25% á milli ára. Gengi USD veiktist um 11,6% og gengi EUR um 9,8% á milli ára. Útflutningsverðmæti sjávarútvegs í heild dróst saman um 15,2%, og nam rúmum 197 milljörðum króna á árinu 2017. Verð á útflutningsvörum í sjávarútvegi lækkaði um 12,1% og magn útfluttra sjávarafurða dróst saman um 3,5%. Á árinu 2017 störfuðu um 7.600 manns við sjávarútveg í heild, sem er um 3,9% af vinnuafli á Íslandi. Veiðigjald útgerðarinnar lækkaði úr 6,9 milljörðum króna fiskveiðiárið 2015/2016, í 4,6 milljarða króna fiskveiðiárið 2016/2017.