„Í yfirstandandi kjaraviðræðum hafa Samtök atvinnulífsins lagt fram tillögur um breytingar á vinnutíma og útreikningi launa. Þær tillögur ganga út á að víkka ramma dagvinnutímans úr 10 klukkutímum í 13, að taka kaffitíma út úr launuðum vinnutíma og að lengja uppgjörstímabil yfirvinnu. Stjórn, trúnaðarráð og samninganefnd Eflingar - stéttarfélags telja að framkvæmd þessara tillagna yrði mikil afturför fyrir kjör almennings á íslenskum vinnumarkaði," segir í ályktun frá Eflingu .
„Stjórn, trúnaðarráð og samninganefnd Eflingar hafna því að greitt verði minna fyrir vinnu utan núverandi marka dagvinnutíma, að sala kaffitíma verði misnotuð til að ná fram styttum vinnutíma og að atvinnurekendum verði gefið aukið vald til að ákvarða hvenær vinna er gerð upp sem yfirvinna og hvenær ekki."
Stjórn, trúnaðarráð og samninganefnd Eflingar segjast jafnframt harma að Samtök atvinnulífsins standi gegn þeirri framför og leggi þess í stað til skerðingar á réttindum verkafólks varðandi vinnutímatakmarkanir.
„Markmið verkalýðshreyfingarinnar í yfirstandandi samningaviðræðum er að bæta kjör verkafólks, ekki rýra þau. Þetta á ekki síst við um vinnutímann og skilgreiningar hans. Stéttarfélög almenns verkafólks, verslunarfólks og opinberra starfsmanna hafa öll lagt til styttingu vinnutímans, og mikill meðbyr er nú með slíkum hugmyndum eins og sást vel á glæsilegri ráðstefnu Lýðræðisfélagsins Öldu um síðustu helgi. Stéttarfélögin studdu við þá ráðstefnu, á meðan SA þáðu ekki boð um þátttöku. Það er vægast sagt sorglegt að framlag SA til þeirrar umræðun sé lenging vinnutímans, sjónhverfingar og skert stjórn verkafólks yfir tíma sínum."
