*

laugardagur, 15. desember 2018
Fólk 4. desember 2018 11:52

Egill Skúlason settur sem nýr prófessor

Innsetningarathöfn nýs prófessor í efnaverkfræði við Háskóla Íslands verður kl. 16 á morgun miðvikudag 5. desember.

Ritstjórn
Dr. Egill Skúlason verður settur í starf prófessors við HÍ klukkan 16:00 miðvikudaginn 5. des í stofu 132 í Öskju.
Aðsend mynd

Dr. Egill Skúlason hlaut nýverið framgang í starf prófessors í efnaverkfræði við Iðnaðarverkfræði-, vélaverkfræði og tölvunarfræðideild Háskóla Íslands.

Hann hefur unnið að rannsóknum sem miða að því að auðvelda framleiðslu á áburði og gera hana sjálfbærari og hefur þegar stofnað sprotafyrirtæki ásamt samstarfsfólki utan um verkefnið segir í fréttatilkynningu frá Háskólanum.

Egill lauk grunnnámi í bæði efnafræði og lífefnafræði við Háskóla Íslands árið 2003 og lauk meistaraprófi í reikniefnafræði við HÍ árið 2005. Því næst lá leið hans til Danmerkur það sem hann hóf doktorsnám í verkfræðilegri eðlisfræði við Danska Tækniháskólann (Danmarks Tekniske Universitet) og brautskráðist með doktorsgráðu árið 2009.

Egill hóf störf að loknu námi við Raunvísindastofnun Háskólans. Árið 2013 hóf Egill störf sem lektor við Raunvísindadeild Háskóla Íslands og hefur síðan þá sinnt kennslu og stundað rannsóknir sem og að setja nýjar námsleiðir á laggirnar í efnaverkfræði og verkfræðilegri eðlisfræði.

Á sér uppáhaldsefnahvörf

Helstu rannsóknir Egils snúa að að skilja hvarfgang efnahvarfa sem og að hanna nýja efnahvata fyrir rafefnafræðileg ferli, en rafefnafræði gerir okkur kleift að nýta endurnýjanlega orku til að knýja ferli áfram. Uppáhalds efnahvörf Egils eru afoxun niturs í ammóníak, afoxun koltvísýring í vistvænt eldsneyti, vetnismyndun, afoxun súrefnis í vatn og oxun niturs í nítrat.

Við rannsóknir sínar beitir rannsóknahópur Egils aðallega skammtafræðilegum tölvureikningum en undanfarin ár hefur Egill og samstarfsmenn hans byggt upp tilraunaaðstöðu í rafefnafræði til að prófa þá efnahvata sem tölvureikningarnir spá fyrir um að vera hentugir fyrir tiltekið rafefnahvarf.

Egill hefur meðal annars verið í nánu samstarfi við Nýsköpunarmiðstöð Íslands og unnið þar að hönnun nýrra framleiðsluferla fyrir sjálfbæra framleiðslu á áburði. Ávöxtur rannsókna og samstarfs á þessu sviði er sprotafyrirtækið Atmonia sem árið 2017 sigraði í Gullegginu, frumkvöðlakeppni Icelandic Startups.

Innsetningarathöfn vegna framgangs Egils Skúlason í starf prófessors verður haldin miðvikudaginn 5. desember kl. 16:00 í stofu 132 í Öskju. Þar mun Egill halda erindi í tilefni dagsins og líta yfir farinn veg í rannsóknum sínum og öðrum störfum. Erindi Egils heitir: Kerfisbundin hönnun rafefnahvata fyrir sjálfbæra framtíð. Innsetningarathöfnin er um það bil ein klukkustund og allir eru velkomnir.