Heildarmagn loðnu í leiðangri Hafrannsóknastofnunar í september mældist 337.000 tonn og þar af var metin stærð veiðistofns vertíðarinnar 2018/2019 um 238.000 tonn. Í frétt Hafró mældust einungis tæplega 11 milljarðar eða 99 þúsund tonn af ungloðnu, en samkvæmt aflareglu þarf yfir 50 milljarða til að mælt verði með upphafsaflamarki fiskveiðiársins 2019/2020.

Gildandi aflaregla byggir á því að skilja eftir 150.000 tonn til hrygningar í mars 2019 með 95% líkum. Tekur aflareglan tillit til óvissumats útreikninganna, vaxtar og náttúrulegrar dánartölu loðnu, auk afrán þorsks, ýsu og ufsa á loðnu.

Í samræmi við ofangreinda aflareglu ráðleggur Hafrannsóknastofnun að ekki verði leyfðar loðnuveiðar á vertíðinni 2018/2019. Hafrannsóknastofnun mun að vanda mæla veiðistofn loðnu að nýju í janúar/febrúar 2019 og í ljósi þeirra mælinga endurskoða ráðgjöfina.

Loðna fannst víða

Bergmálsmælingar á stærð loðnustofnsins fóru fram á rannsóknaskipunum Árna Friðrikssyni og Bjarna Sæmundsyni auk uppsjávarskipsins EROS dagana 6. – 27. september.

Rannsóknasvæðið náði frá landgrunninu við Austur Grænland frá um 75°00’N og suðvestur með landgrunnskanti Grænlands allt suður fyrir Hvarf, en auk þess til Grænlandssunds, Íslandshafs, hafsvæðisins vestan Jan Mayen auk Norðurmiða.

Loðna fannst víða á rannsóknasvæðinu. Ungloðna, sem myndar hrygningar- og veiðistofninn á vertíðinni 2019/2020, var vestast og sunnan til á svæðinu en eldri loðna var mest áberandi út af Vestfjörðum og norður með landgrunni Grænlands. Útbreiðsla loðnu var mjög vestlæg, líkt og verið hefur undanfarin ár. Þó var hærra hlutfall loðnunnar út af Vestfjörðum en verið hefur síðastliðin ár en jafnframt fannst kynþroska loðna nær Grænlandi en áður hefur sést í sambærilegum leiðöngrum.