Eins og fram hefur komið hefst verkfall sjómanna 10. nóvember nk. náist ekki samningar fyrir þann tíma. Á vef Landssambands smábátasjómanna kemur fram að fyrirhugað verkfall nái ekki til áhafna báta í eigu félagsmanna Landssambands smábátaeigenda. Í gildi sé samningur LS við sjómannasamtökin (SSÍ, FFSÍ og VM).
Í skýrslu framkvæmdastjóra LS er hann flutti á aðalfundi félagsins 13. október sl. sagði hann eftirfarandi um viðræðurnar:
„En víkjum þá að kjaraviðræðunum. Aðstæður kölluðu eftir tillögum frá LS. Að lokinni strangri yfirlegu var ákveðið að koma til móts við sjómannasamtökin um kröfu þeirra að allur fiskur fari á markað með eftirfarandi:
Við uppgjör til sjómanna skal miða við 95% af
fiskmarkaðsverði á því svæði sem landað er.
LS treysti sér ekki til að koma með þessa kröfu nema að fá leiðréttingu ákveðinna atriða á móti. Staða viðræðnanna er að samningsaðilar eru að skoða útspil LS. Segja má að verði hún samþykkt kemst betra skikk á markaðinn, samkeppnisstaða jafnast og laun til sjómanna hækka til lengri tíma.
Nái aðilar saman á næstunni verður samningurinn kynntur í svæðisfélögunum og greidd um hann atkvæði.“