Kjaradeila ljósmæðra stendur nú sem hæst, en kjaranefnd ljósmæðra hafnaði í gær miðlunartillögu ríkissáttasemjara. Formaður samninganefndar ljósmæðra sagði við það tilefni í samtali við RÚV að þess hefði verið farið á leit við ráðherra að leggja til 60 milljónir ofan á miðlunartillöguna, en ekki hafi verið vilji til þess.

Svandís Svavarsdóttir, heilbrigðisráðherra, segir það umhugsunarefni að félagskonur í Ljósmæðrafélaginu hafi ekki fengið tækifæri til að taka afstöðu til tillögunnar, sem hún segir hafa verið skynsamleg, en hún segir ríkið hafa teygt sig mjög langt í deilunni.

Katrín Sif Sigurgeirsdóttir, formaður samninganefndar ljósmæðra, segir hinsvegar að í raun hafi þetta verið sama tilboðið í þriðja sinn.

Á miðnætti aðfaranótt miðvikudags síðastliðins hófst yfirvinnubann ljósmæðra, og í kjölfarið var meðgöngu- og sængurlegudeild lokað, og starfsemi hennar sameinuð kvenlækningadeild, ásamt því að framkvæmd fyrstu ómskoðunar var hætt.

Kjaradeilan hefur nú staðið yfir í 10 mánuði, og enn er engin lausn í sjónmáli.