Hlutabréf í tæknifyrirtækjum hafa lækkað mikið í Bandaríkjunum nýverið. Financial Times segir ástæðuna áhyggjur fjárfesta af hægari hagvexti og lakari afkomu fyrirtækja.
Hinir svokölluðu FAANG tæknirisar (Facebook, Amazon, Apple, Netflix og Google) hafa samanlagt lækkað að markaðsvirði um yfir 1.000 milljarð dollara, yfir 123.000 milljarð krónur, frá því þeir stóðu sem hæst fyrr á árinu.
Nasdaq-hlutabréfavísitalan stefnir nú í sinn versta ársfjórðung frá því í kjölfar hruns Lehman Brothers fyrir áratug. Þrátt fyrir smá viðsnúning seinnipart dags stóð vísitalan í 1,3% lækkun það sem af var degi, og hafði þar með nánast öll hækkun frá áramótum þurrkast út.
Þá lækkaði FTSE heimsvísitalan um 1,4% í dag, og stendur nú í 7% lækkun frá áramótum, en aðeins þriðjungur þeirra yfir 3.000 félaga sem hún samanstendur af hafa nú hækkað það sem af er ári.
„Mjög margir í fjármálaheiminum eru að velta því fyrir sér hvað gæti farið vel, og hvað illa, á næsta ári. Það eru miklar umræður um hvað gæti farið úrskeiðis, fyrst og fremst óvissa um alþjóðaviðskipti,“ er haft eftir David Kelly, yfirmanni alþjóðamála hjá eignastýringardeild JPMorgan.
Michael Underhill, yfirmaður fjárfestinga hjá Capital Innovations, segir daginn hafa verið „algert blóðbað fyrir hlutabréf tæknifyrirtækja.“
