Nigel Farage, fyrrverandi leiðtogi breska sjálfstæðisflokksins (UK Independence Party, UKIP), hefur gengið til liðs við bandarísku sjónvarpstöðina Fox News. Farage, sem barðist hvað harðast fyrir útgöngu Bretlands úr Evrópusambandinu, mun gegna stöðu stjórnmálaskýranda og sérfræðings og fréttaskýranda á sviði stjórnmála.
Fox tilkynnti um ráðningu Farage í gær þegar Donald Trump sór embættiseið sem 45. forseti Bandaríkjanna.
Fox er í eigu ástralsk-ameríska fjölmiðlajöfursins Rupert Murdoch. Samkvæmt frétt The Guiardian hefur Murdoch reynt að styrkja tengslin við Trump eftir að sá síðarnefndi bar sigur úr býtum í forsetakosningunum í nóvember. Gabriel Sherman, blaðamaður New York Magazine, segir Murdoch ræða við Trump að minnsta kosti þrisvar í viku.
Farage og Trump hafa mært hvorn annan opinberlega og hefur Trump t.a.m. sagt að Farage gæti orðið frábær sendiherra Bretlands í Bandaríkjunum, á meðan Farage sagði síðastliðinn fimmtudag að Trump væri „Brexit plús plús plús.“