*

föstudagur, 21. september 2018
Innlent 8. október 2012 10:16

Farþegum Icelandair fjölgar um 15% á milli ára

Í lok október verður Icelandair að öllum líkindum búið að flytja jafn marga farþega og allt árið í fyrra.

Gísli Freyr Valdórsson
Aðsend mynd

Icelandair flutti rúmlega 198 þúsund farþega í september sl., sem er 18% fjölgun á milli ára í septembermánuði. Framboð á flugsætum jókst um 17% á milli ára í september. Sætanýtingin nam 81%, samanborið við 78% á sama tíma í fyrra.

Þetta kemur fram í mánaðarlegum flutningstölum frá Icelandair Group. Samkvæmt útreikningum Viðskiptablaðsins stefnir í að í lok þessa mánaðar verði félagið búið að flytja jafnmarga farþega og það flutti allt árið í fyrra.

Icelandair hefur nú flutt tæplega 1,6 milljón farþega það sem af er ári sem er 15% fjölgun á milli ára. Þá hefur framboð félagsins aukist um 14% á milli ára, þannig að farþegafjöldinn hefur aukist umfram framboð. Sætanýting félagsins hefur aukist um 2,1% á milli ára.

Heildarfjöldi farþega hjá Icelandair í fyrra nam tæplega 1,75 milljón farþega, samanborið við tæplega 1,5 milljón farþega árið 2010 og tæplega 1,3 milljón farþega árið 2009. Farþegafjöldi félagsins jókst þannig um 18% á milli ára  fyrra.

 

Mikil aukning í fraktflutningum á vegum samstæðunnar

Farþegum Flugfélags Íslands, sem jafnframt er í eigu Icelandair Group, fækkaði um 5% á milli ára í september þegar félagið flutti rúmlega 28 þúsund farþega. Framboð félagsins dróst saman um 6% á milli ára í september en sætanýtingin jókst um 4% og nam aðeins 70% í september.

Farþegafjöldi Flugfélags Íslands stendur nú að mestu í stað á milli ára það sem af er þessu ári en framboð félagsins hefur þó aukist um 2%.

Nýting flugflota sem nýttur er til útleigu en er í eigu Icelandair Group jókst um 7,7% á milli ára í september en stendur í stað á milli ára það sem af er þessu ári. Hér er átt við vélar í eigu samstæðunnar, meðal annars vélar sem leigðar eru út á vegum Lofteidir Icelandic. Seldum blokktímum hefur þó fækkað um 5% á milli ára það sem af er þessu ári en það má að hluta til rekja til þess að fraktvélar í leiguflugsverkefnum eru einni færri en í fyrra.

Fraktflug á vegum samstæðunnar, sem að mestu fer fram á vegum Icelandair Cargo, jókst um 14% á milli ára í september og hefur aukist um 18% á milli ára það sem af er þessu ári. Þá hefur framboðið af fraktflugi aukist um 7% á milli ára það sem af er ári.

Nýting hótelherbergja í eigu samstæðunnar dróst saman um 4% á milli ára í september en hefur þó aukist um 3,7% það sem af er ári. Á sama tíma hefur framboðið af hótelrými aukist um 14% það sem af er ári. Seldum gistinóttum fjölgarði um 18% á milli ára í september og hefur fjölgað um 20% það sem af er ári.