*

mánudagur, 24. september 2018
Innlent 8. júní 2018 10:24

Farþegum WOW air fjölgaði um 60% í maí

Í maímánuði flutti Wow air 328 þúsund farþega sem er mikil aukning milli ára, en farþegararnir eru 1,2 milljónir það sem af er ári.

Ritstjórn
Skúli Mogensen er stofnandi og eigandi Wow air.
Haraldur Guðjónsson

WOW air flutti 328 þúsund farþega til og frá landinu í maí eða um 60% fleiri farþega en í maí árið 2017. Þá var sætanýting WOW air 90% í maí í ár en var 86% í fyrra. Sætanýtingin jókst þrátt fyrir 59% aukningu á framboðnum sætakílómetrum miðað við sama tímabil í fyrra.

Það sem af er ári þá hefur WOW air flutt um 1,2 milljón farþega. Samkvæmt tölum frá Ferðamálastofu þá er 13% vöxtur ferðamanna til Íslands í maí mánuði drifinn áfram einna helst af ferðamönnum frá Bandaríkjunum. Komufarþegum WOW air fjölgaði um 25% á milli ára samanborið við 13% vöxt heildarmarkaðarins til Íslands.

„Það er verulega jákvætt að sjá áframhaldandi aukningu á ferðamönnum til Íslands. Vissulega má sjá að hægst hefur á vexti enda ekki við öðru að búast eftir 45% vöxt í fyrra. Við ættum öll að líta á þetta sem tækifæri til þess að styrkja innviðina og bæta þjónustuna. Þá er bókunarstaða WOW air í sumar mjög góð og við horfum björtum augum fram á við,“ segir Skúli Mogensen stofnandi og forstjóri WOW air.

WOW air flýgur nú til hátt í fjörutíu áfangastaða í Evrópu og Norður-Ameríku en nýlega bættist Indland við leiðarkerfi WOW air en flug til Nýju Delí hefst í desember á þessu ári. Þá bættust á dögunum við fimm nýir áfangastaðir í Bandaríkjunum; Dallas, Cleveland, Cincinnati, St. Louis og Detroit. Einnig bættust við leiðakerfi félagsins JFK flugvöllur í New York og Stansted flugvöllur í London.

Stikkorð: Skúli Mogensen Wow air farþegar