*

laugardagur, 20. október 2018
Innlent 13. apríl 2018 11:17

Fiskafli dregst saman um fimmtung

Fiskafli í marsmánuði var 22% minni en fyrir ári en heildarafli síðustu 12 mánuði er samt 15% meiri en fyrir sama tímabil ári fyrr.

Ritstjórn
Afla dagsins landað í kari
Haraldur Guðjónsson

Fiskafli íslenskra skipa í mars var 157.277 tonn eða 22% minni en í mars 2017 að því er Hagstofa Íslands greinir frá.

Botnfiskafli var rúm 53 þúsund tonn sem er samdráttur um 6% frá fyrra ári, þar af nam þorskaflinn rúmum 31.500 tonnum sem er 8% minni afli en í mars 2017. Ríflega 6 þúsund tonn veiddust af ufsa og rúm 4 þúsund tonn af ýsu.

Afli uppsjávartegunda nam tæplega 101 þúsund tonnum  sem er 29% minni afli en í mars 2017. Loðna var uppistaðan í uppsjávaraflanum en veiði á henni nam tæpum 82 þúsund tonnum samanborið við tæp 132 þúsund tonn í mars 2017.

Heildarafli á 12 mánaða tímabili frá apríl 2017 til mars 2018 var 1.232 þúsund tonn sem er 15% aukning miðað við sama tímabil ári fyrr.

Stikkorð: Hagstofa Íslands þorskur loðna ufsi ýsa fiskafli heildarafli