Á lokafjórðungi síðasta árs námu fjárfestingar í sprotafyrirtækjum heilum 6 illjörðum króna. Þetta kemur fram í frétt Norðurskautsins , fréttamiðils um frumkvöðlastarf á Íslandi.
Þorri fjárins sem fest var fór til CCP, en eins og Viðskiptablaðið sagði frá hlaut tölvuleikja- og sýndarveruleikaframleiðandinn 30 milljónir bandaríkjadala eða um 4 milljarða íslenskra króna fjárfestingu frá NEA og Novator.
Meðalfjárfestingin, ef fjárfestingu NEA er sleppt úr jöfnunni - sökum þess hvað hún er miklu hærri en hinar fjárfestingarnar - nam einhverjum 2 milljónum bandaríkjadala eða um 253 milljónum króna.
Þá eru stærstu fjárfestingarnar í eftirtöldum fyrirtækjum:
- CCP með 30 milljónir dala
- Arctic Trucks með 3,62 milljónir dala
- ARK Technology með 2,3 milljónir dala
- Sólfar með 2,15 milljónir dala
- Activity Stream með 2,1 milljón dala
Þá skal þess einnig getið að 80% fjárfestinganna kom frá útlendum aðilum - en enn og aftur skal haft í huga að NEA átti svo gífurlegan hluta fjármagnsins að sú tala er að einhverju leyti hlutfallslega brengluð.