*

þriðjudagur, 25. september 2018
Innlent 6. janúar 2015 09:33

Fjárfesta nú þegar í húsnæði fyrir aldraða

Formaður Landssamtaka lífeyrissjóða segir engan fjármagna húsnæði í meiri mæli en sjóðirnir sem heild.

Ritstjórn
Gunnar Baldvinsson, formaður Samtaka lífeyrissjóða.
Birgir Ísl. Gunnarsson

Gunnar Baldvinsson, formaður Landssamtaka lífeyrissjóða, segir lífeyrissjóðina nú þegar fjárfesta í húsnæði fyrir aldraða og enginn fjármagni húsnæði í meiri mæli en sjóðirnir sem heild. Þetta kemur fram á fréttavef RÚV.

Helgi Vilhjálmsson, kenndur við Góu, hratt af stað átaki í lok síðasta mánaðar þar sem hann leitar lífeyrissjóðs sem vill fjárfesta í húsnæði sem hentar öldruðum. Hvatti hann landsmenn til að styðja við málstaðinn með því að skrá nafn sitt á vefnum okkarsjodir.is.

Gunnar segir hins vegar í samtali við RÚV að sjóðirnir hafi þegar fjárfest í slíku húsnæði og nefnir sem dæmi Mörkina og Hrafnistu í Reykjavík, Boðaþing í Kópavogi og dvalarheimili í Borgarnesi og Stykkishólmi. Sagði hann einnig að sjóðirnir gætu stofnað félag um rekstur á húsnæði fyrir aldraða en að þeir hafi ekki sérþekkingu til að reka slíkt húsnæði. Aðrir séu betur til þess fallnir.