Svanhvít Friðriksdóttir, upplýsingafulltrúi WOW air segir í samtali við Viðskiptablaðið að WOW air hafi fundið fyrir auknum áhuga íslendinga á sólarlandaferðum, sem vafalaust tengist afar grámyglulegu veðurfari hérlendis undanfarnar vikur og mánuði. Þá séu mörg flug WOW air nú þegar orðin fullbókuð.

„Við erum þó enn með flugsæti laus á sanngjörnu verði til flestra áfangastaði okkar í sumar, þá meðal annars til Bandaríkjanna, Frakklands, Þýskalands og Ítalíu," segir Svanhvít.

Veðrið þetta sumarið hefur verið óvenju slæmt á suður- og suðvesturhorni landsins en það hefur verið mun skárra fyrir austan. Því hafa margir höfuðborgarbúar lagt leið sína þangað í leit að betra veðri.

Úrkoman í maímánuði var sú versta frá því að mælingar hófust í Reykjavík eða um 129 millimetrar. Útlit er fyrir áframhaldandi rigningu í júlí og ekkert virðist bóla á betri tíð.