*

miðvikudagur, 21. nóvember 2018
Innlent 2. febrúar 2018 11:22

Flotinn minnkaði um 26 skip 2017

Á síðustu fimm árum hafa 70 ný fiskiskip bæst við flotann. Flest þeirra eru skráð á Vestfjörðum en samt fæstir togarar.

Ritstjórn
Sirrý ÍS, togari Bolvíkinga við brimbrjótinn, hafnargarðinn í Bolungarvík.
Aðsend mynd

Alls voru 1.621 fiskiskip á skrá hjá Samgöngustofu í lok árs 2017 og hafði þeim fækkað um 26 frá árinu áður að því er Hagstofan greinir frá. Hins vegar voru sex nýir togarar smíðaðir á árinu, þar af fjögur systurskip. 

Jafnframt hafði stærð togaraflotans aukist um 9.425 tonn frá byrjun ársins, og var hann í heildina 61.841 brúttótonn í lok ársins. Opnum fiskibátum fækkaði á árinu um 15, og voru þeir alls 842 í lok ársins en samanlögð stærð þeirra nam 4.154 brúttótonnum.

Ef horft er hins vegar til síðustu fimm ára hafa 70 ný skip bæst við fiskveiðiflotann. Átta skuttogarar, 37 vélskip og 25 opnir bátar. Alls voru 53 þessara skipa smíðuð á Íslandi og eru þau öll úr trefjaplasti og undir 30 brúttótonnum. Allir togararnir voru smíðaðir í Tyrklandi, ásamt fjórum af þeim sjö vélskipum sem voru yfir 1.000 brúttótonn. 

Fjórðungur skráður á Vestfjörðum en samt fæstir togarar

Flest fiskiskip voru með skráða heimahöfn á Vestfjörðum í árslok 2017, alls 394 skip, en það eru 24% fiskiskipaflotans. Næst flest, alls 290 skip höfðu heimahöfn skráða á Vesturlandi eða 17,9%. Fæst skip eða 74 voru með skráða heimahöfn á Suðurlandi eða 4,6% af heildarfjölda fiskiskipa. 

Flestir opnir bátar voru á Vestfjörðum eða 231 og á Vesturlandi, 163. Fæstir opnir bátar höfðu heimahöfn á Suðurlandi eða 22. Vélskip voru einnig flest, eða 160 á Vestfjörðum en fæst á Höfuðborgarsvæðinu eða 42. 

Hins vegar voru fæstir togarar skráðir á Vestfjörðum og Austurlandi eða samtals 3, en flestir togarar eða 11 höfðu skráða heimahöfn á Norðurlandi eystra og næst flestir eða átta togarar á höfuðborgarsvæðinu.

Stikkorð: togarar Vestfirðir Fiskiskip bátar