Í viðvörun sem Fjármálaeftirlitið hefur sent frá sér til almennings vegna viðskipta með sýndarfé, eða á ensku „virtual currencies“, er bent á að viðskiptin geta verið mjög áhættusöm.
Varar stofnunin neytendur við að fjárfesta í sýndarfé og hætta þannig fjármunum sem þeir mega ekki við því að tapa nema að mjög vel athuguðu máli eins og þeir orða það. Nefnir stofnunin að meðal áhættuþátta sé að slíkt fé sé ekki stutt af undirliggjandi eignum né af annarri stofnun, það er Seðlabankanum.
„Sýndarfé, og þá einkum Bitcoin, fylgir lögmálum spákaupmennsku,“ segir á vef stofnunarinnar þar sem jafnframt er bent á að verð á sýndarfé, eins og Bitcoin, hafi sveiflast gríðarlega undanfarið ár. „Þeir sem kaupa sýndarfé eiga á hættu á að tapa stórum hluta fjárfestingar sinnar.“
Loks nefnir Fjármálaeftirlitið þá áhættuþætti sem meðal annarra fylgja sýndarfé:
- Engin neytendavernd
Engar reglur gilda á markaði með sýndarfé. Þannig er sýndarfé ekki viðurkenndur lögeyrir eða gjaldmiðill samkvæmt íslenskum lögum. Þá fellur slíkur gjaldmiðill hvorki undir ákvæði laga um greiðsluþjónustu nr. 120/2011 né ákvæði laga um útgáfu og meðferð rafeyris nr. 17/2013. Þó að þetta sé meðal þess sem gerir markaðinn með sýndarfé spennandi hefur það jafnframt í för með sér að neytendur njóta ekki þeirrar verndar sem fjármálamarkaður og framangreind lög veita.
- Bólumyndun
Markaður með sýndarfé sýnir skýr merki um bólumyndun þar sem verð er mjög sveiflukennt og ekki tengt undirliggjandi eignum.
- Markaðir með sýndarfé
Markaðir með sýndarfé þurfa ekki starfsleyfi, falla ekki undir lög nr. 108/2007 um verðbréfaviðskipti og lúta ekki eftirliti Fjármálaeftirlitsins. Verðgagnsæi hefur verið ábótavant á þessum mörkuðum og sumir þeirra hafa lent í rekstrarvanda, sem t.d. hefur leitt til stöðvunar viðskipta.
- Enginn bakhjarl
Sýndarfé er ekki stutt af undirliggjandi eignum né af Seðlabönkum.
