Nöfn framkvæmdastjóra tveggja íslenskra lífeyrissjóða er að finna í Panamaskjölunum, eins og kom fram í Kastljósi í gær. Þeir tilkynntu stjórnum sjóðanna ekki um aflandsfélög sem þeim tengdust. Kári Arnór Kárason hefur nú þegar sagt af sér sem framkvæmdastjóri Stapa lífeyrissjóðs. Hinn er Kristján Örn Sigurðsson, framkvæmdastjóri Sameinaða lífeyrissjóðsins. Nánar er fjallað um málið í Morgunblaðinu í dag.
Kári Arnór greindi frá afsögn sinni og sendi frá sér yfirlýsingu á laugardaginn var. Þar kvaðst hann hafa fengið hringingu frá Kastljós vegna þess að nafn hans tengdist tveimur félögum í Panamaskjölunum. Annars vegar var um að ræða félag sem Kaupþing stofnaði í Lúxemborg árið 1999. Þá sagði hann MP banka hafa stofnað hitt félagið fyrir sína hönd árið 2004. Kári sagði í yfirlýsingu að hann hafi aldrei lagt neina fjármuni inn á fyrra félagið og að hitt félagið hafi aldrei verið notað.
Lét stjórn lífeyrissjóðsins ekki vita
Þorbjörn Guðmundsson, varaformaður stjórnar Sameinaða lífeyrissjóðsins, sagði í gærkvöldi í samtali við Morgunblaðið að stjórninni hefði ekki gefist tækifæri til að ræða málið við Kristján Örn. Kristján lét stjórn lífeyrissjóðsins ekki vita af tveimur aflandsfélögum sem hann var skráður fyrir.
Stjórnarfundur verður hjá Sameinaða lífeyrissjóðnum á morgun og einnig ársfundur. Þorbjörn sagði að stjórnin myndi væntanlega óska eftir skýringum frá framkvæmdastjórann á stjórnarfundinum. Hann kvaðst ekki hafa hugmynd um hver niðurstaða þess samtals yrði. Þorbjörn kvaðst aðspurður telja ljóst að einhver umræða yrði um málið á ársfundinum og að sjóðsfélagar myndu vilja fá skýringar.
