Algjört frost ríkir í viðræðum milli stærstu lífeyrissjóða landsins og Kaupskila, sem er eignarhaldsfélag sem heldur utan um 87% Kaupþings í Arion banka, um möguleg kaup lífeyrissjóðanna á stórum hluta í bankanum, að því er kemur fram í umfjöllun ViðskiptaMogganum .

Kergjan innan sjóðanna stafar meðal annars af því að forsvarsmenn sjóðanna hafa ekki fengið að sjá áreiðanleikakönnun sem gerð var á rekstri og efnahag bankans. Sömuleiðis hafa sjóðirnir ekki fengið verðmat í hendurnar sem ráðgjöfum þeirra var uppálagt að vinna. Sú vinna hefur tafist talsvert af óútskýrðum ástæðum.

Samkvæmt heimildum ViðskiptaMoggans, er helst beðið eftir því hvort að Lífeyrissjóður verslunarmanna ákveði að fjárfesta í Arion banka eður ei. Í umfjölluninni segir einnig að: „Enn hafa líkur minnkað á að lífeyrissjóðir gerist stórir hluthafar í Arion banka.“