Samtök verslunar og þjónustu (SVÞ) hafa sent frá sér umsögn um frumvarp sjávarútvegs- og landbúnaðarráðherra um breytingar á búvörulögum. Í frumvarpinu er meðal annars innleidd sekt við að kaupa mjólk sem er framleidd utan greiðslumarks.
SVÞ lýsa fyrðu sinni á því að sambandið hafi ekki fengið frumvarpið til umsagnar, þrátt fyrir að innan sambandsins séu flest þau fyrirtæki sem sjá um að koma mjólkurvörum til neytenda. Þá segir í umsögninni að samtökin telja það furðu sæta að frumvarpið hafi verið unnið í beinni samvinnu við hagsmunasamtök bænda og afurðastöðva, án þess að nokkrir aðrir hafi haft möguleika á aðkomu að þeirri vinnu.
Verið að innleiða einokun
„Með frumvarpi þessu er verið að innleiða algera einokun við vinnslu og markaðssetningu á mjólkurafurðum á Íslandi. Er þar með verið að hverfa frá því skrefi sem stigið var fyrir fáum árum þegar opnað var fyrir nokkra samkeppni á þessum markaði. Frumvarpið, ef af lögum verður, mun fela í sér eitt alvarlegasta afturhvarf frá frjálsri samkeppni sem sést hefur um langt árabil hér á landi. Hér er verið að velja einokun og hafna atvinnufrelsi. SVÞ hafna þessum lagasetningaráformum algerlega, enda eru þau í hreinni andstöðu við það stefnumið samtakanna að frjáls óháð samkeppni skuli ríkja á öllum sviðum atvinnulífsins. Með því móti verði neytendum í landinu tryggð vara og þjónusta á eins hagstæðum kjörum og kostur er hverju sinni
