Kýpur hefur fengið fyrsta skammt neyðarlánsins frá Evrópusambandinu og Alþjóðagjaldeyrissjóðnum. Lánið er alls um 10 milljarðar evra, en tveir milljarðar voru greiddir út í dag og þá á að bætast við milljarður fyrir 30. júní næstkomandi.

Í frétt BBC segir að fjármálaráðherrar evruríkjanna muni líklega samþykkja síðustu greiðslu af neyðarláninu til Grikklands og mun greiðslan að öllum líkindum nema 7,5 milljörðum evra.

Þá munu fjármálaráðherrarnir ræða stöðu Slóveníu, sem margir búast við því að sé að fara sömu leið og Grikkland og Kýpur og muni innan tíðar þurfa á fjárhagslegri aðstoð að halda.