mánudagur, 30. maí 2016
Erlent 20. ágúst 2012 17:49

Gengi Apple aldrei hærra en nú

Virði Apple er nú um 623 milljarðar dala. Væntingar eftir nýjum iPhone og ódýrari útgáfu af iPad hífa upp gengi félagsins.

Ritstjórn
Aðsend mynd

Gengi bandaríska tölvuframleiðandans Apple  fór um tíma í dag upp í 664,7 dali á hlut sem þýðir að geng fyrirtækisins hefur aldrei verið hærra. Þegar þetta er skrifað, um kl. 17.45 á íslenskum tíma, er gengið um 661,4 á hlut.

Apple hefur frá síðustu áramótum verið verðmætasta skráða fyrirtækið í sögunni en það hefur þó aldrei verið verðmætara en nú. Samkvæmt vef Bloomberg fréttaveitunnar er virði félagsins nú um 623 milljarðar Bandaríkjadala. Apple er samkvæmt þessu um 50% verðmætara en olíufyrirtækið Exxon Mobil.

Að sögn Bloomberg má rekja hækkun á gengi Apple til þess að von er á nýjum síma frá fyrirtækinu, iPhone 5, auk þess sem gert er ráð fyrir því að fyrirtækið kynni ódýrari útgáfu af iPad spjaldtölvunni fyrir áramót.

Fyrra met í virðismati fyrirtækja átti hugbúnaðarfyrirtækið Microsoft sem árið 1999 var metið á um 620,6 milljarða dali. Sé tekið tillit til verðbólgu var raunvirði þess þá um 850 milljarðar dala á núvirði. Virði Microsoft er í dag um 257 milljarðar dala. 

Stikkorð: iPad Apple iPhone