Rétt í þessu barst kauphöllinni tilkynning um sameiningu Iceland Travel ehf., sem er að fullu í eigu Icelandair Group, og Allrahanda GL ehf. sem er í eigu stofnenda fyrirtækisins auk fjárfestingarfélagsins Akur. Allrahanda starfar hér á landi undir merkjum Gray Line samkvæmt leyfissamningi við Gray Line Worldwide.

Í kjölfar samrunans mun Icelandair Group eiga 70% í hinu sameinaða fyrirtæki meðan eigendur Allrahanda GL ehf. munu eiga 30%. Samruninn er háður samþykki samkeppnisyfirvalda.

Velta Gray Line á árinu 2015 nam 3,6 milljörðum íslenskra króna, með EBITDA sem nam 600 milljónum. Ári seinna var veltan 3,9 milljarðar með 200 milljónir í EBITDA hagnað.

Sameinað fyrirtæki er áætlað að hafi veltu sem nemur 18 milljörðum króna, en fyrirtækin hafa lengi verið í samstarfi um sérhæfingu á mismunandi sviðum ferðaþjónustugeirans.