Stefnt er að því að greiða hluthöfum Símans árlega arð og/eða framkvæma endurkaup sem nemur 20-50% af hagnaði eftir skatta í samræmi við lög og reglur hverju sinni. Kemur þetta fram í skráningarlýsingu vegna væntanlegs útboðs á 18%-21% eignarhlut Arion banka í Símanum.1
Áður en kemur að skráningu Símans mun fara fram almennt útboð á hlutabréfum í félaginu dagana 5.-7. október. Miðað við lágmarksverð útboðsins, sem er 2,7 krónur á hlut nemur heildarstærð þess 4,7-5,5 milljörðum króna og svarar það til um 26 milljarða króna markaðsvirðis alls hlutafjár í Símanum. Áætlað er að kostnaður við skráningu félagsins á markað verði um 145 milljónir króna.
Tvær tilboðsbækur verða í boði fyrir fjárfesta. Í tilboðsbók A verður fjárfestum boðið að skrá sig fyrir kaupum að andvirði á bilinu frá 100 þúsund krónum og upp í 10 milljónir króna. Þar verður tekið við áskriftum á verðbilinu 2,7-3,1 króna á hlut en eitt endanlegt útboðsgengi í tilboðsbók A verður ákvarðað af seljanda í lok útboðs. Í tilboðsbók B verður tekið við áskriftum að andvirði yfir 10 milljónum króna. Þar verður lágmarksverð 2,7 krónur á hlut og ekkert hámarksverð tilgreint af seljanda en eitt endanlegt útboðsgengi í tilboðsbók B verður ákvarðað af seljanda í lok útboðs sem verður jafnt eða hærra útboðsgengi í tilboðsbók A.
