*

laugardagur, 17. nóvember 2018
Innlent 27. ágúst 2015 16:39

Guðlaug vill verða formaður Bjartrar framtíðar

Fjórir hafa lýst yfir áhuga á að vera stjórnarformenn Bjartrar framtíðar á landsfundi þann 5. september næstkomandi.

Ritstjórn
Guðlaug Kristjánsdóttir
Birgir Ísl. Gunnarsson

Guðlaug Kristjánsdóttir, formaður bæjarstjórnar í Hafnarfirði og bæjarfulltrúi Bjartrar framtíðar, hefur tilkynnt opinberlega að hún vilji verða næsti formaður flokksins. Hún er þar með eini frambjóðandinn sem hefur formlega lýst yfir áhuga sínum á embættinu, að því er kemur fram á vef Bjartrar framtíðar. Guðlaug Kristjánsdóttir var áður formaður BHM.

Landsfundur flokksins verður haldinn þann 5. september næstkomandi í Reykjanesbæ. Guðlaug hefur einnig lýst yfir áhuga á embætti stjórnarformanns flokksins. Fyrir eru þrír aðrir sem hafa lýst yfir áhuga á embætti stjórnarformanns, en það eru þau Karólína Helga Símonardóttir, Matthías Freyr Matthíasson og Preben Pétursson.

Nokkur styr hefur verið um formannsslaginn í Bjartri framtíð. Til að mynda lýsti Heiða Kristín Helgadóttir því yfir í upphafi mánaðar að hún væri opin fyrir því að taka við formannsstólnum af Guðmundi Steingrímssyni. Hún skipti hins vegar um skoðun í gær, en sagði í samtali við mbl.is að nauðsynleg hreinsun hefði átt sér stað innan flokksins. Aðspurð sagði hún að sér hugnaðist best ef næsti formaður flokksins yrði kvenkyns.