Guðmundur Hörður Guðmundsson hefur tilkynnt að hann hyggist bjóða sig fram sem formaður Neytendasamtakanna. Guðmundur sat í stjórn samtakanna frá 2012 til 2014. Áður var hann formaður Landverndar.
Guðmundur mun bjóða sig fram á þingi Neytendasamtakanna sem fer fram þann 27. október næstkomandi. „Neytendasamtökin hafa gengið í gegnum erfitt tímabil að undanförnu og það felur að mínu mati í sér tækifæri til að staldra við, ná áttum og endurbyggja samtökin á þeim trausta grunni sem lagður hefur verið í 65 ár. Á þessum tímapunkti eigum við að vera óhrædd við að breyta áherslum og mála samtökin í nýjum litum.“ segir Guðmundur.
Meðal þess sem Guðmundur segist ætla að leggja áherslu á, verði hann kjörinn, er andstaða við hækkanir á neyslusköttum, barátta fyrir því að matvæli fari aftur í 7% virðisaukaskattþrep, vönduð umfjöllun um netviðskipti, andstaða við ofvexti bankakerfisins, að stöðva starfsemi smálánafyrirtækja, og aukið samstarf við ýmsa aðila.
