Mál Gylfa Arnbjörnssonar, forseta ASÍ, í tengslum við setu hans í félagi sem hafði tengsl við aflandseyjuna Tortóla komst aftur í kastjósið eftir lekann á Panama-skjölunum títtnefndu.
Gylfi sendi frá sér yfirlýsingu í dag í kjölfar þess að raddir tóku að heyrast þess efnis að mótmælendur hyggðust hittast hjá ASÍ í dag kl: 17:00 og taka á móti afsögn hans vegna málsins.
Málið kom fyrst upp árið 2009
Hann bendir á að málið hafi fyrst komið upp árið 2009 og þá hafi hann sent frá sér tilkynningu sem skýrði hans hlið málsins. Gengur það út á að í kringum síðustu aldarmót hafi Gylfi verið framkvæmdarstjóri Eignarhaldsfélags Alþýðubankans hf. (EFA) og samhliða því í stjórnum þeirra fyrirtækja sem félagið átti hlut í. EFA átti meðal annars í hugbúnaðarfyrirtækinu Hugviti (sem seinna varð GoPro/Landssteinar).
Í yfirlýsingunni fer Gylfi yfir hvernig Hugvit stækkaði mikið á þessum árum og verið með dótturfélög víða um heim með erlenda starfsmenn. Það hafi komið fram krafa starfsmanna um að hafa valrétt að hlutabréfum Hugvits og stjórn félagsins hafi samþykkt það.
Gylfi segir að niðurstaða endurskoðanda hafi verið að halda utan um kaupréttina í nýju félagi sem væri staðsett í Lúxemborg. Ástæða þess væri að eignarhaldsfélög þar í landi eru ekki skattlögð og stjórnin hafi talið rétt að starfsmenn myndu greiða skatta í samræmi við skattalöggjöf í þeim löndum þar sem þeir störfuðu og bjuggu. Ef utanumhaldið hefði verið í íslenska móðurfélaginu hefðu allir starfsmenn, jafnvel þótt þeir væru búsettir erlendis, þurft að greiða skatta á Íslandi af kaupréttunum.
Segir Gylfi að upplýsingaskylda hafi hvílt á félaginu í Lúxemborg og því hafi aldrei komið annað til greina en að upplýsa skattayfirvöld í viðkomandi löndum um þau laun eða hlunnindi sem starfsmenn þess myndu fá. Það væri ekkert öðruvísi með félagið í Lúxemborg.
Kaupþing í Lúxemborg kom að stofnun félagsins
Tengsl félagsins við Tortóla komu svo til að stjórn Hugvits hafði samband við Kaupþing í Lúxemborg til að stofna þetta félag og segir Gylfi að svo virðist vera sem bankinn hafi átt félög í Lúxemborg á lager sem hafi verið stofnuð af einstaklingum á Tortóla. Stjórn Hugvits hafi aftur á móti ekkert vitað um þetta, annað en að búið væri að koma á fót félaginu og að það héti Motivation Investment Holding og væri staðsett í Lúxemborg. Þau hafi ekkert vitað af því að upphaflegir stofnendur þess hafi verið staðsettir á Tortóla.
Gylfi segir að nú sé að koma í ljós að bankarnir hafi stundað þessa iðju að stofna félög með þessum hætti til að dylja eignarhaldi. Þau hafi verið stofnuð í Lúxemborg með duldu eignarhaldi í Tortóla þannig að enginn vissi hver væri á bak við það. Í tilviki Hugvits hafi eignarhaldinu aftur á móti verið breytt og það opinbert hver ætti félagið þegar það var komið í eigu Hugvits.
Ekkert varð úr að félagið væri notað, en netbólan um aldarmótin sprakk áður en eitthvað varð úr þessum hugmyndum og hlutar félagins voru seldir og aðrir lagðir niður. Gylfi hafi síðan hætt störfum sem framkvæmdarstjóri EFA í júlí 2001 og hætt samhliða öllum störfum og stjórnarsetu fyrir hönd EFA.
Kom ekki fram með ósiðlegum eða ótrúverðugum hætti
Gylfi telur skýrt að hann hafi ekki komið fram með ósiðlegum eða ótrúverðugum hætti í þessu máli. Það að stofna fyrirtæki í Lúxemborg með það afmarkaða og skilgreinda hlutverk að tryggja jafnræði starfsmanna í ljósi þeirra skattareglna sem giltu í þeirra heimalandi, væri fremur til eftirbreytni en bera vott um siðleysi. Fullyrðingar um að hann hafi staðið að því að koma eignum eða tekjum undan skatti séu einfaldlega rangar.
Yfirlýsingu Gylfa má finna hér.