Hætt hefur verið við að selja íslenska lyfjafyrirtækið Medis til Brasilíska fyrirtækisins EMS að því er Morgunblaðið greinir frá. Viðskiptablaðið sagði frá því í byrjun október að ísraelska lyfjafyrirtækið Teva, sem á Medis, hyggðist selja félagið til brasílíska félagsins, en það hafði verið í söluferli frá því í ágúst í fyrra.
Var Medís verðmetið á hálfan til heilan milljarð dala, eða sem nemur 56-112 milljarða króna á þeim tíma, en fleiri félög, eins og Recipharm væru að skoða kaup á Medis.
Valur Ragnarsson forstjóri Medis hefur stigið til hliðar í kjölfar þess að hætt var við söluna, en Medís verður áfram hluti af samstæðu Tevis að sögn Sigfúsar Arnar Guðmundssonar markaðs- og samskiptastjóra Medís.
„Teva telur Medis áfram geta skapað fyrirtækinu, sjúklingum og viðskiptavinum Medis mikil verðmæti til framtíðar,“ segir Sigfús. Eftir að Valur hættir hjá Medis verða áfram þrír starfandi framkvæmdastjórar hjá félaginu hér á landi, það er Jónina Guðmundsdóttir, Hildur Ragnars og Ágúst Helgi Leósson.
