Hafsteinn Hauksson hefur gengið til liðs við GAMMA Capital Management Ltd. í London. Þetta kemur fram í tilkynningu sem birt var á vef sjóðstýringarfélagsins fyrr í dag.
Hafsteinn lauk B.Sc. námi í hagfræði frá Háskóla Íslands og er með meistaragráðu í fjármálum og hagfræði frá London School of Economics. Hafsteinn stundaði á yngri árum nám við Verzlunarskóla Íslands.
Hann hefur starfað hjá ráðgjafarfyrirtækinu Newstate Partners í London frá árinu 2015, en fyrirtækið sérhæfir sig í ráðgjöf á sviði opinberra fjármála, þar á meðal stýringu og endurskipulagningu opinberra skulda.
Hafsteinn var áður hagfræðingur í greiningardeild Arion banka og starfaði einnig sem fjölmiðlamaður með námi, lengst af á fréttastofu Stöðvar 2. Auk þess sem margir kannast við hann úr Morfís heiminum.
Hafsteinn bætist þar með í öflugt teymi starfsmanna GAMMA með starfsaðstöðu í London. Markmið eigenda og stjórnenda GAMMA hefur verið að útvíkka og styrkja grundvöll starfseminnar þar í landi. GAMMA hóf starfsemi í London árið 2015 og í fyrra fékk félagið sjálfstætt starfsleyfi frá breska fjármálaeftirlitinu í Bretlandi.
Leyfið heimilar GAMMA að veita viðskiptavinum sínum víðtæka fjármálaþjónustu, sem felur meðal annars í sér fyrirtækjaráðgjöf og fjárfestingarráðgjöf.
