Hagar hafa lækkað um 4,60% í 266 milljón króna viðskiptum það sem af er degi í kauphöll Nasdaq Iceland í morgun. Er gengi bréfa félagsins komið niður í 39,40 en eins og Viðskiptablaðið greindi frá í morgun hefur Samkeppniseftirlitið sett skilyrði við kaup félagsins á Olíuverzlun Íslands og fasteignafélaginu DGV.
Almennt er rautt um að litast í kauphöllinni, ekkert félag hefur hækkað, en ekki hafa enn átt sér stað nein viðskipti með þrjú félög. Öll hin hafa lækkað í verði það sem af er viðskiptadegi.
Hefur Úrvalsvísitalan af þessum sökum lækkað um 0,76%, niður í 1.743,92 stig, en N1 hafa lækkað næst mest á eftir Högum, eða um 3,56% þegar þetta er skrifað. Var það í 122 milljón króna viðskiptum og fór gengið niður í 122 krónur.
