Hagnaður Advania á Íslandi nam 173 milljónum króna á fyrri helmingi þessa árs og ríflega þrefaldaðist frá sama tímabili í fyrra. Þetta kemur fram í tilkynningu frá Advania.
Heildartekjur Advania námu 6.078 milljónum króna á fyrri hluta þessa árs og hækkuðu um 5,3% milli ára. EBITDA nam 527 milljónum króna og jókst um 45% frá sama tímabili í fyrra. Þá hækkaði EBITDA hlutfallið úr 6,3% í fyrra í 8,7% nú.
Í tilkynningunni segir Ægir Már Þórisson, forstjóri Advania á Íslandi:
„Rekstur félagsins gekk mjög vel á fyrri hluta ársins og allar helstu kennitölur eru sterkar. Tekjuvöxturinn er sérstaklega ánægjulegur, ekki síst í ljósi þess að hluti teknanna er í erlendri mynt og gengisþróun á tímabilinu var óhagstæð. Eftirspurn eftir okkar þjónustu hefur aukist mikið og við sjáum fram á áframhaldandi vöxt, enda horfa öll stærri fyrirtæki til upplýsingatækninnar í auknum mæli til að efla sinn rekstur, auka skilvirkni og styrkja sig á samkeppnismarkaði. Í því felast mikil tækifæri fyrir okkur."
Advania er leiðandi fyrirtæki á sviði upplýsingatækni og veitir viðskiptavinum alhliða þjónustu og ráðgjöf. Starfsmenn Advania á Íslandi eru 600 talsins. Fyrirtækið varð til með sameiningu nokkurra af öflugustu upplýsingatæknifyrirtækjum landsins árið 2012. Félagið er hluti af Advania samstæðunni, sem er orðin eitt stærsta félag sinnar tegundar á Norðurlöndum með starfsemi á yfir 20 stöðum.“
