Hagnaður Amazon á öðrum ársfjórðungi var vel yfir væntingum greiningaraðila þökk sé skýjaþjónustu fyrirtækisins og yfirburða netverslunar þess, og fór í fyrsta sinn í sögu félagsins yfir 2 milljarða dollara, en í fyrra fór hagnaður þess í fyrsta skipti yfir 1 milljarð dollara. Þetta kemur fram í ársfjórðungsuppgjöri félagsins sem birt var í gær og Financial Times segir frá .

Hagnaður á hlut var rúmir 5 dollarar, sem er yfir tíföldun þeirra 40 senta á hlut sem félagið hagnaðist um á sama fjórðungi í fyrra, og tvöfalt það sem greiningaraðilar höfðu gert ráð fyrir.

Tekjur jukust um 40 prósent í tæpa 53 milljarða dollara, sem var ögn lægra en greinendur höfðu spáð, og skýrist af hægari alþjóðlegum vexti en spár gerðu ráð fyrir.

Hlutabréf félagsins hækkuðu um 4% í kjölfarið, eftir 3% lækkun fyrr um daginn.

Niðurstöðurnar eru góðar fréttir fyrir tæknigeirann, aðeins degi eftir að hlutabréf í Facebook féllu um allt að fjórðung .