Bílasalan Brimborg hagnaðist um 326,7 milljónir á árinu 2015. Það er aukning um 264 milljónir milli ára, en árið 2014 nam hagnaðurinn 62,1 milljón króna. Hagnaðaraukning fyrirtækisins nam því um 425% milli ára. Handbært fé Brimborgar nam 257 milljónum í lok árs, en jókst þá um 235 milljónir milli ára.
Tekjur ársins námu 13 milljörðum króna, meðan rekstrarkostnaður var tæpir 11 milljarðar króna. EBITDA félagsins var þá 1,09 milljarður króna, en aukning EBIDTA milli ára nam 58%. Afskriftir og fjármagnsgjöld námu 730 milljónum og tekjuskattur var þá 82 milljónir króna.
Eignir félagsins eru samtals 6,8 milljarðar króna. Þar af er eigið fé einn milljarður króna og skuldir félagsins 5,8 milljarðar króna. Það gefur eiginfjárhlutfall upp á 14,6%. Skuldir félagsins jukust um milljarð milli ára meðan eigið fé hækkaði um rúmar 330 milljónir.
Brimborg seldi alls 1.936 nýja bíla. Það er 51% söluaukning frá árinu á undan. Þá er Ford stærsta merki Brimborgar. Í ársreikningi segir að arður verði ekki greiddur út fyrir árið heldur verði hagnaðurinn fluttur til næsta árs. Hluthafar í félaginu eru sex talsins, en þar af er Jóhann J. Jóhannsson með stærstan hlut eða 33% og forstjóri fyrirtækisins Egill Jóhannsson með 27%.
