Hagnaður Íslandsbanka eftir skatta á fyrsta ársfjórðungi nam 2,1 milljarði króna, sem er 30% samdráttur um fá sama tímabili árið áður þegar hagnaðurinn nam 3,0 milljarði króna.

Arðsemi eigin fjár nam 4,8% á fjórðungnum, en á sama tíma árið 2017 nam hún 7,0%. Birna Einarsdóttir bankastjóri Íslandsbanka segir að á ársfjórðungnum hafi efnahagsreikningur bankans stækkaði um 5,1% og nema þeir nú 1.088 milljarði króna.

Birna segir kostnaðinn enn of háan

„Það var góður gangur í nýjum húsnæðislánum sem uxu um 5% frá árinu á undan,“ segir Birna. „Kostnaður er enn of hár hjá bankanum en 2,9% raunhækkun frá fyrra ári má að mestu má rekja til launakostnaðar vegna vinnu við nýtt innlána- og greiðslukerfi auk annarra samningsbundinna launahækkana.“

Hagnaður af reglulegri starfsemi fór úr 3,5 milljörðum króna niður 2,9 milljarða, og var arðsemi eigin fjár af reglulegri starfsemi miðað við 15% eiginfjárhlutfall þáttar 1 (CET1) 8,2% á fjórðungnum. Á 1. ársfórðungi 2017 var það 10,6%. Hreinar vaxtatekjur jukust um 4,6% og voru 7,7 milljarðar en voru 7,4 milljarðar. Vaxtamunur var 2,9% sem er sama og fyrir ári.

Hreinar þóknanatekjur voru 2,8 milljarðar, sem er lækkun frá 3,3 milljörðum árið áður um 15%. Má að mestu rekja hana til lækkunar á þóknanatekjum í tveimur dótturfélögum bankans segir í fréttatilkynningu bankans. Stjórnunarkostnaður án einskiptisliða hækkaði um 7,3% milli ára og nam hann 6,8 milljörðum króna. En sé tekið tillit til verðbólgu fyrir tímabilið, þá var hækkunin 2,9%.

201 milljóna meiri útlán en innlán

Útlán til viðskiptavina jukust um 2,8%, eða um 21 milljarð króna á fyrstu þremur mánuðum ársins og nema þau 776 milljörðum króna í heildina. Ný útlán á fjórðungnum voru 42 milljarðar og dreifðust vel á milli viðskiptaeininga bankans á meðan innlán frá viðskiptavinum hækkuðu um 1,4% eða 8,2 milljarða frá árslokum 2017. Heildarinnlánin voru 575 milljarðar.

Bankinn gaf í janúar út 300 milljóna evru skuldabréf á 75 punkta álagi yfir millibankavexti í evrum til 6 ára en með innköllunarheimild eftir 5 ár. Viðskiptin mörkuðu tímamót í rekstri Íslandsbanka en um var að ræða lengstu skuldabréfaútgáfu og bestu kjör erlendis sem íslensk fjármálastofnun hefur notið frá árinu 2008 segir í tilkynningunni.

Byggja sjálfir á gömlu höfuðstöðvalóðinni

Í febrúar kynntu Íslandssjóðir uppbyggingarfélagið 105 Miðborg til leiks sem mun reisa í samstarfi við fjárfesta, nýtt 42.000 fermetra borgarhverfi á Kirkjusandi á næstu árum. Á aðalfundi bankans í mars var samþykkt að greiða 13 milljarða króna af hagnaði ársins 2017 í arð til hluthafa en bankinn hefur þá greitt um 76 milljarða króna í arð til hluthafa frá árinu 2013.

Sjálfvirkur afgreiðslubúnaður bankans vegna umsókna um yfirdráttarheimild hefur samþykkt um 4.500 lánveitingar frá því hann var tekinn í notkun byrjun febrúar. Nýlega opnaði Íslandsbanki fyrir samstarf við nýsköpunarfyrirtæki um þróun á framtíðar fjártæknilausnum fyrir viðskiptavini.