Rekstrartekjur Íslandspósts jukust um 12,2% milli áranna 2015 og 2016 og námu þær 8.524 milljónum króna á árinu 2016. Hagnaðist pósturinn um 121 milljón krónur á síðasta ári en á árinu þar á undan tapaði bankinn 118 milljónum króna.
EBITDA nam 726 milljónum króna og var hlutfall þess af rekstrartekjum 8,5% en árið áður var hlutfalli 4,8%.Handbært fé frá rekstri jókst einnig milli ára úr 222 milljónum króna í 501 milljón. Fjárfestingarhreyfingar hækkuðu einnig úr 275 milljónum króna í 383 milljónir.
Í fréttatilkynningu póstsins segir að mikill vöxtur hafi verið í pakkasendingum og að vörudreifing sé sífellt vaxandi þáttur í rekstri Íslandspóst sem sé samkvæmt áherslum fyrirtækisins.
Vörudreifing sífellt mikilvægari
„Ljóst er að vörudreifing mun skipa sífellt mikilvægara hlutverk í rekstri Íslandspósts en markmið fyrirtækisins er að veita viðskiptavinum framúrskarandi þjónustu á sviði dreifingar-, samskipta-, og flutningalausna," segir í tilkynningunni.
„Með því er unnið á móti áhrifum af verulegri fækkun bréfa sem hefur verið viðvarandi síðasta áratug. Frá árinu 2001 hefur árituðum bréfum undir 50g fækkað um 57% og á árinu 2016 nam fækkun bréfa 7%."
Fyrr í mánuðinum náði Íslandspóstur samkomulagi við Samkeppniseftirlitið um að aðskilja samkeppnisstarfsemi frá starfsemi sem byggir á einkarétti til póstsendinga eins og Viðskiptablaðið hefur greint frá .
Viðsnúningur eftir taprekstur síðustu ára
„Góður viðsnúningur varð á árinu 2016, en félagið skilaði hagnaði upp á 121 milljón króna sem er langþráð breyting eftir taprekstur síðustu ára. Reksturinn gekk vel á árinu 2016 þrátt fyrir að enn vanti upp á að félagið skili þeim hagnaði sem arðsemisstefna þess gerir ráð fyrir,“ er haft eftir Ingimundi Sigurpálssyni forstjóra Íslandspósts í tilkynningunni.
Heildartekjur eru vaxandi en hreinn hagnaður var nokkru minni en gert hafði verið ráð fyrir einkum vegna gengisáhrifa þar sem styrking krónunnar leiddi til gengistaps.
Á hinn bóginn gekk eftir umtalsverð lækkun kostnaðar milli ára, m.a vegna fækkunar dreifingardaga í sveitum sem er liður í margvíslegum hagræðingaraðgerðum sem gripið hefur verið til á síðustu árum og leitt hafa til sparnaðar í rekstri sem nemur nú árlega um 1,2 milljörðum króna."
Segir rekstrarumhverfið flókið
Fór forstjórinn meðal annars inn á fyrrnefnda stöðu fyrirtækisins gagnvart einkaréttinum og þeim skyldum sem fyrirtækið þarf að uppfylla.
„Ljóst er að rekstrarumhverfi Íslandspósts er á margan hátt flókið þar sem fyrirtækið fer með einkarétt ríkisins á dreifingu póstsendinga undir 50g, ber víðtækar lögboðnar alþjónustuskyldur ríkisins um land allt og á milli landa og er háð greiðslum samkvæmt alþjóðasamningum, sem allt í senn hefur verið fyrirtækinu kostnaðarsamt," segir Ingimundur.
Einkaréttur þjóni ekki hagsmunum félagsins
„Stjórnendur Íslandspósts hafa um árabil vakið máls á því að einkaréttur í bréfadreifingu þjóni ekki hagsmunum félagsins og talað fyrir því að einkarétturinn verði afnuminn eins og gert er ráð fyrir í pósttilskipun Evrópusambandsins.
Jafnhliða afnámi einkaréttar ríkisins þurfa stjórnvöld að ákveða umfang póstþjónustunnar og þá hvort og hvernig standa eigi undir kostnaði við lögbundna þjónustu, sem til þessa hefur að fullu verið borin uppi af Íslandspósti án opinberrar aðkomu, ólíkt því sem við á víðast hvar í Evrópuríkjum.
Ljóst er að forsendur póstþjónustunnar eru brostnar og er nauðsynlegt að niðurstaða fáist sem allra fyrst um mat á kostnaðarlegri byrði vegna alþjónustuskyldu.“