Hagnaður Samkaupa af reglulegri starfsemi eftir skatta nam 316 milljónum, þetta er meðal þess sem kom fram í ársuppgjöri Samkaupa sem kynnt var á aðalfundi félagsins sem haldinn var þann 15. mars síðastliðinn.
Velta Samkaupa nam tæplega 24,5 milljörðum á árinu 2016 og jókst um tæp 10% frá fyrra ári. Samkaup reka 47 verslanir á 33 stöðum um allt land, undir merkjum Nettó, Kjörbúðin, Krambúð, Samkaup úrval og Samkaup strax. Starfsmenn félagsins voru 945 í 506 stöðugildum árið 2016.
Hluthafar Samkaupa voru 178 í lok árs 2016. Kaupfélag Suðurnesja ásamt dótturfélögum átti 61,9% hlut, Birta lífeyrissjóður átti 14,5% hlut og Kaupfélag Borgfirðinga átti 13,0%. Aðrir hluthafar áttu minna en 10% hver um sig.
Á aðalfundi Samkaupa voru eftirtaldir kosnir í stjórn félagsins:
- Skúli Skúlason, formaður Reykjanesbæ
- Árelía Eydís Guðmundsdóttir Reykjavík
- Margrét Katrín Erlingsdóttir Árborg
- Guðsteinn Einarsson Borgarbyggð
- Halldór Jóhannsson Akureyri