Síminn hf. hagnaðist um 2,15 milljarða króna á fyrstu níu mánuðum ársins 2016. Þetta kemur fram í nýbirtu árshlutauppgjöri félagsins. Hagnaðurinn nam 2,20 milljörðum á sama tíma í fyrra.
Tekjurnar á fyrstu þremur fjórðungum ársins reyndust 21.264 milljónum króna samanborið við 21.903 milljónir á sama tímabili 2015.
Hagnaður Símans á þriðja ársfjórðungi reyndist 1.128 milljónir samanborið 873 milljónir á sama fjórðungi í fyrra. Tekjurnar á fjórðungnum voru 7.129 milljónum króna samanborið við 7.156 milljónir á sama tímabili 2015.
EBITDA félagsins var 2,58 milljarðar króna á þriðja ársfjórðungi 2016 samanborið við 2,36 milljarða króna á sama tímabili 2015. EBITDA hlutfallið var 35,5% fyrir þriðja ársfjórðung 2016 en var 31,3% á sama tímabili í fyrra.
Eiginfjárhlutfall Símans hf. var 53,9% í lok þriðja ársfjórðungs 2016 og eigið fé 33,7 milljarðar króna.
Í tilkynningu frá Símanum segir Orri Hauksson, forstjóri félagsins, vera stoltur af árangrinum. Hann bendir m.a. á að rekstrarhagnaður fyrir afskriftir hafi aukist um tæpar 220 milljónir króna milli ára.
„Við erum stolt af árangrinum á þriðja ársfjórðungi, en rekstrarhagnaður fyrir afskriftir jókst um tæpar 220 milljónir króna milli ára. Fjarskiptamarkaðurinn er einkar líflegur um þessar mundir og samkeppnin hörð. Góð þjónusta til viðskiptavina og aukinn straumur ferðamanna léku lykilhlutverk í bættri afkomu samstæðunnar milli ára. Þess utan er viðsnúningurinn frá fyrri hluta árs ekki síst afrakstur hagræðingar innan samstæðunnar, til að mæta auknum launakostnaði og verðlækkunum. Þannig hefur stöðugildum fækkað um 14% á árinu hjá móðurfélagi Símans hf. Þá hafa dótturfélög verið seld og reksturinn einfaldaður, til að ná skýrari fókus á kjarnastarfsemi og auka samkeppnishæfi.
Virði áskrifta fyrir viðskiptavini hefur vaxið á fjarskiptamarkaðnum. Það sjá áskrifendur Heimilispakkans, sem fjölgar ört, og eins hafa Fjölskyldu- og Krakkakort í farsíma slegið í gegn. Upplýsingatæknieining samstæðunnar, Sensa, mun eiga mjög gott ár. Innviðafélagið Míla mun tengja 30 þúsund heimili með ljósleiðara fyrir árslok, en þetta átak fer fram án jarðrasks og með afar lágum framkvæmdakostnaði. Starfsmenn samstæðunnar hafa gert vel í rekstri hennar það sem af er ári og rekstrarspáin er óbreytt fyrir árið í heild.“
Fjarskipti hf., einn helsti samkeppnisaðili Símans, lækkaði um rúm 4% í viðskiptum dagsins, en uppgjör félagsins var birt í gær.