*

föstudagur, 21. september 2018
Innlent 14. desember 2016 13:03

Hagsmunatengsl dómara verða birt

Hæstiréttur Íslands hefur ákveðið að birta á heimasíðu sinni upplýsingar um hagsmunatengsl dómara frá byrjun komandi árs.

Ritstjórn
Haraldur Guðjónsson

Upplýsingar um hagsmunatengsl hæstaréttardómara verða aðgengilegar á heimasíðu réttarins frá byrjun komandi árs. Þetta kemur fram í fréttatilkynningu frá Hæstarétti Íslands, en eins og Viðskiptablaðið hefur fjallað um þá hefur verið mikil umræða um hagsmunatengsl dómara undanfarið.

„Hæstiréttur hefur ákveðið að frá byrjun árs 2017 verði aðgengilegar á heimasíðu réttarins upplýsingar um hagsmunatengsl hæstaréttardómara,“ segir í tilkynningu réttarins.

„Við ákvörðun um efni þessara upplýsinga hefur verið tekið mið af því sem dómurum ber að tilkynna nefnd um dómarastörf um samkvæmt fyrirmælum 26. gr. laga nr. 15/1998 um dómstóla  og reglum settum samkvæmt þeim. 

Eignir og skuldir dómara birtar

Jafnframt hefur verið  litið annars vegar  til reglna Alþingis um skráningu á fjárhagslegum hagsmunum alþingismanna  og  trúnaðarstörfum  utan  þings  og  hins  vegar  til  þess  hvernig  atriðum  sem þessum er hagað á Norðurlöndunum.

Á þessum grunni munu upplýsingarnar varða eftirfarandi meginatriði:

  1. Aukastörf hvers og eins dómara ásamt því hvort greiðsla komi  fyrir þau og þá úr hendi hvers.
  2. Fasteignir í eigu dómara  sem ætlaðar eru til annars en eigin nota fyrir hann og fjölskyldu hans.
  3. Eignarhluta í hvers kyns félögum.
  4. Allar skuldir dómara sem ekki tengjast beinlínis öflun fasteignar til eigin nota.
  5. Aðild dómara að félögum sem ekki starfa með fjárhagslegu markmiði.

Upplýsingar þessar munu miðast við stöðu í ársbyrjun 2017 og verða  þær framvegis uppfærðar jafnskjótt og tilefni er til.

Telji aðilar að einstökum dómsmálum sig þurfa að fá tilgreindar upplýsingar um eitthvert áðurgreindra atriða á tilteknu fyrra tímamarki varðandi dómara í málum þeirra geta þeir beint fyrirspurn um það til Hæstaréttar.“