Hlutabréf á mörkuðum asíu lækkuðu nokkuð í nótt, meðan markaðir voru opnir á svæðinu mánudag.
Markaðsaðilar virðast stýrast af varkárni vegna væntinga um að olíuframleiðsluríki muni draga úr olíuframleiðslu í kjölfar fundar OPEC landanna seinna í vikunni.
Óvissa vegna kappræðna og olíuframleiðslu
Einnig eru væntanlegar forsetakappræður í Bandaríkjunum, sem verða seint á mánudagskvöldi þar í landi, að valda sumum áhyggjum, en margir markaðsaðilar óttast afleiðingar þess ef Donald Trump, sem meðal annars hefur talað gegn fríverslunarsamningum, vinni kosningarnar. Ef hann stendur sig vel í kappræðunum megi vænta aukinna sviptinga á mörkuðum.
Hlutabréf í olíufyrirtækjum og tengdum iðnaði lækkuðu jafnframt, olíuleitarfyrirtækið Inpex Corp. frá Japan sá hlutabréf í fyrirtækinu lækka um 2,32%, og á sama tíma lækkuðu bréf í kínverska olíufyrirtækinu Sinopec um 2,88% á mörkuðum í Hong Kong og olíuframleiðandinn Cnooc lækkaði um 2,22%, en fyrirtækið framleiðir olíu af hafsbotni.
Morgan Stanley væntir þess að á fundinum verði engin ákvörðun tekin um framtíð olíuvinnslu, nema að fresta ákvörðunartöku þangað til samtökin funda á ný í nóvember. Bankinn telur að áfram verði olíuverð óstöðugt.
Helstu vísitölur á svæðinu
- Nikkei vísitalan í Japan lækkaði um 1,25%
- Kospi vísitalan í Suður Kóreu lækkaði um 0,34%
- Taiwan Weighted vísitalan lækkaði um 0,97%
- Hang Seng vísitalan í Hong Kong lækkaði um 1,69%
- FTSE China A50 vísitalan lækkaði um 1,28%
- Dow Jones Shanghai vísitalan hefur sem af er lækkað um 1,75%, en markaðurinn er enn opinn.
- S&P&/ASX 200 vísitalan í Ástralíu stóð nánast í stað, með einungis 0,12 punkta hækkun.
- Dow Jones New Zealand vísitalan lækkaði um 0,42%