Á aðalfundi Íslandspósts fyrr í dag tilkynnti Ingimundur Sigurpálsson að hann hefði ákveðið að segja starfi sínu lausu sem forstjóri fyrirtækisins eftir rúmlega fjórtán ára starf. Eins og Viðskiptablaðið sagði frá fyrir skömmu hafa árslaun Ingibundar hækkað úr 14 í 25 milljónir á þremur árum, sem er um 78% hækkun á tímabilinu.
Ingimundur nefndi mikla umfjöllun um laun sín og annarra ríkisforstjóra í kringum kjaraviðræðurnar sem nú standa yfir þó ekki í yfirlýsingu sinni um ástæðu þess að hann væri að hætta heldur að miklar breytingar væru óhjákvæmilega framundan á fyrirkomulagi póstþjónustunnar með gildistöku nýrra laga um póstþjónustu, sem áformað væri að taki gildi í ársbyrjun 2020.
Mikilvægt væri að nýr forstjóri fengi svigrúm til þess að koma að og móta undirbúning nauðsynlegra breytinga, sem óhjákvæmilega fylgja gildistöku nýrra laga um póstþjónustu í ársbyrjun 2020.
Yfirlýsing Ingimundar:
Samgönguráðherra hefur á Alþingi mælt fyrir frumvarpi að nýjum lögum um póstþjónustu. Með nýjum póstlögum verða miklar breytingar á fyrirkomulagi póstþjónustunnar og munu þau mjög líklega hafa víðtæk áhrif á rekstur Íslandspósts.
Frumvarpið gerir ráð fyrir afnámi einkaréttar ríkisins á dreifingu áritaðra bréfa og þar er jafnframt opnað fyrir möguleika á fjármögnun á þeim hluta lögbundinnar póstþjónustu, sem ekki stendur undir kostnaði tengdum henni.
Mikilvægt er að nýr forstjóri fái möguleika á því að koma að og móta undirbúning nauðsynlegra breytinga, sem óhjákvæmilega fylgja gildistöku hinna nýju laga í ársbyrjun 2020, og hafi þá jafnframt möguleika á að fylgja þeim eftir.
Það hefur verið mjög áhugavert, gefandi og krefjandi að koma að rekstri Íslandspósts undanfarin fjórtán ár. Á ýmsu hefur gengið í rekstri félagsins á þessu tímabili, einkum eftir efnahagshrunið 2008, en í kjölfar þess hefur bréfum fækkað verulega.
Á sama tíma hefur verið unnið að viðamiklum breytingum á rekstri félagsins, sem fylgt hafa miklum samdrætti í bréfasendingum á sama tíma og pökkum og þyngri sendingum hefur fjölgað umtalsvert.
Þá hefur veruleg hagræðing náðst með margvíslegum umbótum í rekstri félagsins sem og fækkun póstafgreiðslna og dreifingarstöðva jafnhliða endurbótum á allri aðstöðu fyrir viðskiptavini og starfmenn fyrirtækisins.
Á þessum tímamótum er mér efst í huga þakklæti fyrir að hafa fengið tækifæri til þess að vinna hjá traustu og öflugu fyrirtæki með starfsstöðvar um allt land og í víðtækum alþjóðlegum samskiptum. Það er ómetanlegt að hafa átt kost á að vinna með kraftmiklu og frábæru fólki, sem hefur lagt sig fram um að vinna af vandvirkni og heilindum og skila framúrskarandi starfi.
Ég er þakklátur fyrir það sem áunnist hefur og þó að enn hafi ekki tekist að ná fram fullri viðurkenningu á því að stærsti viðskiptavinur Íslandspósts greiði fyrir þá þjónustu, sem fyrir hann er sinnt, þá vænti ég þess og treysti að með nýjum póstlögum verði vel fyrir því séð.
Ég þakka samstarfsfólki ómetanleg samskipti og framúrskarandi samstarf og sömuleiðis þakka ég stjórnarmönnum félagsins í áranna rás fyrir góða samvinnu, traust og stuðning.
Hér má lesa fleiri fréttir um málefni Íslandspósts:
- 4. janúar 2019 - Sameinuðu félögin án samþykkis SKE
- 21. desember 2018 - Segjast spara 1,6 milljarð á ári
- 11. desember 2018 - Pósturinn segist ekki misnota stöðu sína
- 6. desember 2018 - Segja yfirklór Póstsins aumt
- 5. desember 2018 - Segjast ekki hafa brotið sáttina
- 3. desember 2018 - Yfir milljarður í Kínasendingar
- 26. nóvember 2018 - „Fara í samkeppni við allt sem hreyfist“
- 22. september 2018 - Ekki gefið að ríkið láni Póstinum
- 8. september 2018 - Titringur á póstmarkaði
- 16. október 2018 - FA kvartar vegna brota póstsins
- 24. febrúar 2018 - Hagnaður póstsins nærri 80% hærri
- 24. janúar 2018 - Pósturinn skili hagræðinu til notenda
- 11. nóvember 2017 - Pósturinn segist ekki misnota stöðu sína
- 12. mars 2018 - Íslandspóstur hafnar ásökunum FA
- 21. febrúar 2017 - FA: Tortryggnin áfram til staðar
- 17. febrúar 2017 - Íslandspóstur hlítir ítarlegum skilyrðum
- 17. febrúar 2017 - Íslandspóstur aðgreini starfsemi
- 18. september 2016 - Nær vaxtalaust 310 milljóna lán
- 29. febrúar 2016 - Íslandspóstur tapaði 118 milljónum
- 11. maí 2015 - Fátt um svör á fundi fjárlaganefndar
- 15. apríl 2015 - Íslandspóstur verði seldur
Hér má lesa pistla um málefni Íslandspósts:
- 3. desember 2018 - Keppt við allt sem hreyfist
- 7. október 2016 - Íslandspóstur býr tortryggnina til sjálfur