Evrópusambandstilskipanir og tilheyrandi lagaumgjörð hefur gert íslenskum orkufyrirtækjum kleift að selja upprunaábyrgðir fyrir rafmagnsframleiðslu fyrir hundruð milljóna á hverju ári.

Salan gefur erlendum orkufyrirtækjum tækifæri til að líta betur út á pappírum þó framleiðsla þeirra sé ekki gerð með umhverfisvænum hætti. Á sama tíma dregur úr getu íslensku orkufyrirtækjanna til að votta að framleiðsla þeirra sé umhverfisvæn.

Söluandvirðið gæti verið meira en milljarður

Orka náttúrunnar, dótturfyrirtæki Orkuveitunnar, hafði um 60 milljónir króna í tekjur af sölu upprunaábyrgða og HS Orka þénaði um 40 milljónir frá sams konar sölu í fyrra að því er Morgunblaðið greinir frá. Rarik og dótturfyrirtæki þess hafa ekki selt frá sér ábyrgðir en hins vegar eru upplýsingar um sölu Landsvirkjunar á upprunaábyrgðum ekki opinberar.

Heildarorkumagnið sem vottun var seld fyrir á síðasta ári nam 7,6 TWh en nú þegar á þessu ári er magnið komð í 8,9 TWh, svo aukningin hlýtur að teljast mikil milli ára. Þar af seldi Landsvirkjun um 5 TWh á síðasta ári að því er Morgunblaðið greinir frá.

Þar sem verðið á vottunum hefur sveiflast mikið, eða frá 0,3 til 2,1 evra á hverja MWst gætu tekjur Landsvirkjunar á sölunni vera á bilinu 180 milljónir upp í ríflega 1,2 milljarða. Íslensk orkufyrirtæki eru langt að baki nágrönnum okkar Norðmönnum í sölu upprunaábyrgða, en á síðasta ári seldu þeir yfir 161 Twh úr landi, sem er meira en tuttufalt það ígildi orkumagns sem selt var úr landi hérlendis.