Þrátt fyrir að hálfgerðar dómsdagsspár hafi birst í fyrirsögnum fjölmiðla um allan heim í kringum Brexit þjóðaratkvæðagreiðsluna og forsetakjör Donalds Trump í Bandaríkjunum hækkuðu hlutabréfamarkaðir á heimsvísu á síðasta ári. MSCI heimsvísitalan hækkaði um rúmlega 8% og hafa alþjóðlegir hlutabréfamarkaðir hækkað samfleytt frá árinu 2011. Ekki er útlit fyrir að viðsnúningur verði á þessari þróun á árinu, heldur eru horfur á erlendum mörkuðum almennt jákvæðar.
Þetta sagði Robert Parker, aðalráðgjafi fjárfestingarbankans Credit Suisse, á ráðstefnu Kviku á Grand Hótel fyrir viku. Parker kynnti þar horfur á erlendum mörkuðum fyrir árið 2017, en hann hefur sótt landið heim á ári hverju frá 2004 og gefið fjárfestum innsýn í tækifæri og áhættur í öllum eignaflokkum á erlendum mörkuðum í samstarfi við Kviku og forvera bankans. Hann er í hópi virtustu ráðgjafa og sérfræðinga í Evrópu þegar kemur að greiningu markaða, ráðgjöf og eignastýringu.
Hagvöxtur batnandi fer
Hagvöxtur á heimsvísu fer batnandi og spáir Credit Suisse auknum hagvexti í heiminum árið 2017, eða 3,4-3,5% borið saman við 3% væntan hagvöxt árið 2016. Leiðandi hagvísar á borð við vísitölur pantanastjóra (PMIs) og framleiðsluvísitölur í stærstu hagkerfum heims og á evrusvæðinu eru enn fremur á uppleið.
Að sögn Parkers eru efnahagshorfur í Bandaríkjunum góðar. Spáð er allt að 2,5% hagvexti. Bandaríkin eru stærsta hagkerfi heims og þ.a.l. er gott efnahags ástand þar jákvætt fyrir aðra heimshluta. Einkaneysla, framleiðsla og fjárfesting hefur verið að aukast og væntingavísitölur hafa hækkað. Enn fremur er gott ástand á vinnumarkaði.
Lykil þátturinn í efnahagslegri framvindu Bandaríkjanna er þó fjármálastefna Trumps. Ef marka má kosningaloforð Trumps mun hann lækka fyrirtækjaskatta, auka innviðafjárfestingar og minnka regluverkið. „Trump mun slaka á aðhaldi ríkisfjármála, sem mun hafa jákvæð áhrif á bandaríska hagkerfið og hlutabréfamarkaðinn þrátt fyrir að peningamálastefnan verði aðhaldssamari,“ sagði Parker. Væntingar eru um að fjármálastefna Trumps muni hækka verðbólgu í Bandaríkjunum í 2,5%.
Í Evrópu hægir víða á hagvexti, en spáð er um 1,4% hagvexti á evrusvæðinu. Útflutningur í Evrópu mun aukast með veikingu evrunnar undanfarið á móti Bandaríkjadollar. Horfurnar í evrópskum stjórnmálum fram í september eru þó óljósar og ríkir mikil pólitísk óvissa í Evrópu vegna kosninga í Hollandi, Frakklandi, Ítalíu og Þýskalandi á árinu. Stjórnmálaöfl andvíg Evrópusambandinu og evrunni hafa verið að sækja í sig veðrið samkvæmt skoðanakönnunum.
„Óvissan mun draga úr fjárfestingum í Evrópu, sem hamlar hagvöxt. Vegna kosninganna munu evrópsk ríki auka aðhald í ríkisfjármálum, sem setur þrýsting á Seðlabanka Evrópu til að halda magnbundinni íhlutun áfram, en það hefur neikvæð áhrif á evruna,“ sagði Parker. Enn fremur eru fjármálakerfi enn löskuð víða í Evrópu, t.d. á Ítalíu og Grikklandi, sem hægir á hagvexti.
Vöxtur í nýmarkaðsríkjum fer einnig batnandi og spáir Credit Suisse 5,8% hagvexti í BRIC-löndunum. Hrávörumarkaðir hafa tekið við sér eftir lægð síðustu ára, sem hefur jákvæð áhrif á nýmarkaði. Hlutabréfamarkaðir á ný mörkuðum eru hlutfallslega ódýrari en á þróaðri mörkuðum og mun hlutabréfaverð því hækka meira á nýmörkuðum.
Hagvöxtur í Asíu er enn mikill þrátt fyrir að hafa lækkað undanfarin ár. Í Kína eru einkaneysla, smásöluvelta og innviðafjárfestingar í miklum vexti. Í Japan hefur gengisstyrking jensins undanfarna tvo mánuði dregið úr verðhjöðnunaráhættu, aukið útflutning og uppfært hagvaxtarspár í allt að 1,3%.
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .